Riyadh: Saudi Arab mein Aramco ne shumal maghribi ilaqay mein tail aur gas ke naye zakhair aur wasti ilaqay mein ek Oil Field daryaft kiye jaanay ka elaan kiya hai. Saudi Aramco ke mutabiq 2020 ki pehli sah mahi ke douran oil aur gas ki 2 nai fileds daryaft huvi hain, Un mein se ek field gas aur tail ke zakhair se malamaal hai jabkay doosri sirf oil field hai.
Tafseelaat ke mutabiq Aramco ne kaha hai ke mumlikat ke shumal maghrib mein ek field daryaft huvi hai jahan gas aur tail ke zakhair bharay huve hain. Wasti ilaqay mein oil field daryaft huvi hai. Aramco saal 2019 ke douran gas ki talaash ka bhi kaam kiya gaya jis se sehraa mein gas field daryaft huvi aur gas ke 5 baday zakhair record par aaye. Alawa azeen gas ke 6 kunvey kamyabi se tayyar karliye gaye. Yaad rahay ke Saudi Arab ki sab se badi tail ki company Aramco ney apni pehli sah mahi mein 16.63 Arab dollar kamaye hain aur 13.4 Arab Dollar Share Holders mein taqseem kiye hain. –YTN STAFF