Riyadh: Duniya bhar mein beloun ki ladai mashhoor hai. Lakhoun loog Europi mumalik khasosan Spain mein beloun ke darmain muqablay dekhte rehtay hain lekin kabhi kahin bhi ye suneney mein nahi aaya ke is qisam ki koi ladai Oontoun ke darmain hui ho ya kisi qoum ya qabeeley ne Oontoun ke darmain ladai ka muqaabla munaqqid karwaya ho lekin ab is maidan mein Oontoun ne bhi qadam jamaye hain.
Tafseelaat ke mutabiq Saudi Arab mein Oontoun ki ladai ka muqaabla hone laga hai. Spain mein beloun ke darmain hone wali ladai aur Saudi Arab mein Oontoun ke darmain hone wali ladai ke muqablay mein farq ye hai ke beloun ki ladai mein khoon behta hai. Oontoun ki ladai khonrizi se pak hai.
Saudi Arab ki tareekh mein pehli baar Shah AbdulAziz Camel Mela mein Oontoun ke darmain ladai ka intizam kiya gaya hai. Ye Mela poori duniya mein Oontoun ke shaiqeen ke liye sab se bada Mela maana ja raha hai. Saudi Arab mein Oontoun ki ladai ka muqaabla apni noiyat ka pehla hai. Is ka intizam King AbdulAziz camel Mela ki intizamia ne kiya hai. Is ka tareeqakar ye hai ke Mela mein mojood kisi 1 shakhs ka makhsoos tareeqakar ke mutabiq intikhab kiya jata hai. Muntakhib shakhs Akhadhi mein pouncha diya jata hai jahan 2 sala Oont mojood hota hai. Is ke liye khaas Akhadhe tayyar kiye gaye hain.
Muqablay ke douran koi 1 shakhs ek minute ke liye Oont se takkar laita hai. Agar wo Oont ko muqarara waqt ke andar girane mein kamyaab hojaye to usay kamyaab qarar day diya jata hai aur muqablay mein harne wala Oont is ka hojata hai aur agar wo muqarara waqt ke douran Oont ko girane mein kamyaab nah ho to kisi aur hamla aawar ka intikhab hota hai aur usay Oont ko girane ke liye 25 second se kam ka waqt diya jata hai. Agar wo is challenge par poora utartaa hai to baday award ka haqdaar ban jata hai.
Is qisam ke muqablay King AbdulAziz Camel Mela mein ho rahay hain. Ye Mela poori duniya mein shareek Oontoun ki tadaad aur Mela ke raqbay ke hawalay se sab se bada aur awaami maqboliat ke hawalay se sab se munfarid hai. Ye Mela 225 kelo murabba meter ke raqbay mein munaqqid kiya jata hai. Is mein 4 Arab Riyal maliyat se ziyada ke Oont laaye gaye hain. Oontoun ke sath ladai ka muqaabla bhi be hadd maqbool hogaya hai. –YTN STAFF