Riyadh: Arab parliament ney Arab duniya mein Turkey aur Iran ko androoni mamlaat mein dakhal andazi se roknay ke liye mushtarqa hikmat e amli ki manzoori di hai. Arab parliament ka video ijlaas speaker Dr Mashal Al Salmi ki sadarat mein huwa hai. Arab parliament ney Iran aur Turkey se nimatnay ke liye tajaweez ka jaiza liya.
Hikmat-e-amli ke mutabiq Turkey ka muqaabla teen mahazoun par kiya jaye ga. Pehlay mahaaz ka talluq ghair mutazalzal ahdaaf aur usooloun se hai. Dosray ka talluq Arab duniya ko khatraat la-haq karne walay zaraye, Un se nimatnay aur inhen roknay se hai jabkay teesray ka talluq bunyadi tareqekar se hai.
Mushtarqa Arab hikmat e amli ke tehat Iran se nimatnay ke liye Arab mumalik ke androoni umoor mein is ki mudakhilatoun ko roka jaye ga. Doosri janib aalam Arab ke aman o istehkaam ko mutazalzal karne wali Irani Policies ka muqaabla kiya jaye ga. Teesri janib Arab mumalik mein Iran se marboot kisi bhi tanzeem ya musallah Malaysia ke qiyam ki mukhalifat ki jaye gi.
Arab parliament neh apni hikmat e amli batatay huve daawa kiya hai ke Iran Arab duniya mein apna inqilab bar aamad karkay Arab mumalik ke aman o istehkaam ko khatraat peda kar raha hai. Iran amarat ke 3 jazeroun par najaaiz qabza kiye huva hai. Arab duniya mein firqa waranah fitna bhad ka raha hai aur dehshatgardi ki sarparasti kar raha hai. Iran ke hawalay se is umor ki janib bhi ishara kiya gaya ke wo Yemen mein Haosee baghioun ko smart hathyaar, Ballistic Missile aur Drones muhayya kar raha hai. Saudi Arab ki tail tansibat par hamloun mein mobayyana tor par yahi hathyaar istemaal kiye jarahay hain.
Iran ke hawalay se ye bhi kaha gaya ke wo Arab khittay mein aalmi tijarat aur samandari jahaaz rani ke raastoon ko maskhdoosh kar raha hai aur ilaqai salamti ko teh o baala karne ke darpay hai. Arab hikmat e amli ke tehat ye bhi bataya ke Turk hukoomat shaam aur Libya mein barah e raast fouji mudakhilat kar rahi hai. Iraqi qaumi khud mukhtari ko musalsal pamaal kar rahi hai jabkay Sham aur Libya mein Malaysia qaim karkay inhen jadeed asleha se lais kar rahi hai.
Bayan mein ye bhi kaha gaya ke kayi Arab mulkoun mein satellite channels aur zaraye ablaagh ki sarparasti bhi Turkey ki taraf se ki jarahi hai. Ijlaas mein tey kiya gaya ke Turkey ki har terhan ki mudakhilat se nimta jaye ga. Sab se pehlay aqwam mutahidda se darkhwast ki jaye gi ke wo Sham, Libya aur Iraq se Turkey ko apni afwaj bulanay ki hidayat kere.