Lacknow: Riyasat Uttar Pradesh ke shehar ghaziabad mein Coronavirus Lockdown ke douran dilchasp waqea pesh aaya jab ek nojawan ghar se sauda-sulaf lainay gaya aur wapsi par dulhan sath le aaya aur maamla Police tak poanch gaya. NDTV ki Website par shaya honay wali Report ke mutabiq nojawan ki Maa ne betay ki khufia shadi ko qubool karne se inkaar kar diya aur usay apni dulhan ke sath ghar mein daakhil honay se rokk diya.
Maamla yahin khatam nahi balkay khufia shadi karne walay nojawan ki Maa is ke baad Police Station poanch gayi aur apne betay ke khilaaf Report likhwate huve kaha ke mein ne usay ghar ka sauda salaf lainay bheja tha lekin wo apne sath biwi le aaya hai. Jisay mein hargiz qubool karne ke liye tayyar nahi hon.
Doosri janib Maa se choup kar shadi karne walay nojawan Guddu ne kaha hai ke un ki shadi 2 mah qabal huvi thi lekin Maa ke dar se apni biwi ko ghar nahi laya tha. Wo Delhi mein karaye ke ghar mein reh rahi thi lekin Lockdown ke baais usay wo makaan chhodna pada.
Nojawan ke mutabiq shadi ke waqt gawahan kam honay ki wajah se usay shadi ka Certificate nahi mil saka tha. Certificate ke liye usay ek baar jana tha lekin Lockdown ke baais nahi ja saka. Police ne is sorat e haal ka hal ye nikala hai ke dulhan jis karaye ke makaan mein reh rahi thi is ke maalik se kaha hai ke fi al-waqt inhen makaan se nah nikala jaye. –YTN STAFF