Apne bachon ki behtar taleem ke mansoobah ke sath hi walidain ke zehen mein shehar ke behtareen lekin khangi school ki fehrist gasht karne lagti hai kyunkay khangi school mein sarkari school ki bah nisbat ziyada behtar infrastructure hota hai jabkay sarkari school ki aksariyat aisi hoti hai jahan pani, bijli aur baitul-qala jaisi bunyadi sahuliyaat hi nahi hoti hain, isi liye walidain –apne bachon ko behtar se behtar khangi school mein dakhla kerwatay hain lekin shayad mustaqbil qareeb mein yeh rujhan badal jaye ga kyunkay Telangana hukoomat ne sarkari school ko khangi aur corporate school ki tarz par taraqqi dainay ke liye kayi aik iqdamaat shuru kar chuki hai.
Telangana hukoomat ne corporate idaron ke barabar school mein bunyadi dhanchay ko behtar bananay aur is maqsad ke liye 2000 crore rupay mukhtas karne ke faislay ke baad mutaliqa ohdedaron ko hadaayat naame ko hatmi shakal dainay ki hadaayat di hai. kabeena ki zeli committee ne aik ijlaas munaqqid kya jis mein Minister of Information Technology K. T. Rama Rao, wazeer khazana Harshi Rao, wazeer taleem S sabitha indra reddy, panchayat raj ke wazeer Errabelli Dayakar Rao, aur mutaliqa ohdedar shareek hue. zeli committee ne sarkari school ki taraqqi ke liye uthaye jane walay iqdamaat ke baray mein ohdedaron se sawal kiya aur bataya ke cheif minister K. Chandrashekar Rao ka maqsad KG se PG tak mayaari taleem muft fraham karna hai.
ALSO READ:-Schools ke liye pipe water supply, Telangana ko ek aur aizaz
Telangana ki tashkeel ke baad reyasti hukoomat ne mayaari taleem ki farahmi ke liye mutadid anokhay iqdamaat uthaye hain. wazraa ne kaha ke sarkari school ki behtari ke liye mazeed kamray, nayi emiratein, peenay ka pani, digital class rooms aur deegar bunyadi dhanchay muhayya kiye jayen ge. yahan is baat ka tazkara bhi ahem hai ke awam ke zehnon mein yeh ghalat fehmi bas gayi hai ke sarkari school mein khangi school se behtar taleem nahi hoti lekin sarkari school ke usaatzaa ki taleemi qabliyat khangi school ke usaatzaa se kahin ziyada behtar hoti hai, jaisa ke khangi school mein jahan kam tankhwahon par kam taleem Yafta afraad ko teacher banadiya jata hai wahein sarkari school mein bunyaad taleem mein bhi degree, B.ad ko laazmi qarar diya jata hai.