Riyadh: Saudi Arab mein coronavirus ke masail se nimatnay par mamoor committee ney hidaayat jari ki hai ke sarkari aur khangi idaray Sanitizing Walk Through Gates istemaal nah karen. ye Gates muzir sahet hain. Khangi aur sarkari idaroun ney virus se bachao ke liye Sanitizing Walk Through Gates nasb karwaye hain lekin nai tahaqeeq se saabit huwa hai ke ye sahet ke liye muzir hain.
Tafseelaat ke mutabiq coronavirus ke insidaad par mamoor committee ne tamam sarkari aur khangi idaroun ko tehreeri tor par mutala karte huve kaha hai ke jab tak wabai amraaz se bachao ke liye qaim qaumi markaz baqayeda tehreri tor par ijazat na de is waqt tak coronavirus ke insidaad ke liye barah e raast ya bal-wasita koi bhi Technology ya Machine ya dawa ya tibbi lawazmaat istemaal nah kiye jayen.
Insidaad coronavirus committee ne tawajja dilaye ke Sanitizing walk through Gates aisay mukhtalif qisam ke Chemicals istemaal kar rahay hain jin se insani sahet par bura asar pad raha hai. Ilawa azeen baalaye banafshi shu-aon se insani khalioun mein moroosi Genetic madah talaf hojata hai ya un se DNA kisi nah kisi shakal mein juzwi shakal mein mutasir hota hai. Jis qisam ke chemical mawaad walk through Gates istemaal kar rahay hain wo dawakhanoun, Tayyaroun aur dafatir ko Sanitizing karne ke liye istemaal kiye jatay hain. Un se peenay ka pani bhi saaf kiya jata hai.
Saudi Food and Drugs Authority ne taaza tareen report mein kaha hai ke Sanitizing walk through Gates naye coronavirus ko phelnay se roknay mein mo-asar saabit nahi huve Sanitizing gate chemical mawaad ke istemaal aur tijarti marakaz, Dafatir aur Airports ke darwazoun par nasb kiye gaye. Ye chemical mawaad aur baalaye banafshi shu-aon ke zariye apna maqsad haasil nahi kar sakay.