Lucknow : Samajwadi party ( SP ) ke sadar Akhilesh Yadav ne Uttar pradesh mein aman o Amaan ki bigadti sorat-e-haal ko ujagar karne ke liye 9 August ko reyasti satah par ehtejaj munazzam karne ka elaan kiya hai. SP sadar ne kaha ke ehtejaji muzahiray ” yom-e-inqilab “ ke sath kiye jayenge, jo salana 9 August ko manaya jata hai.
Party ke qaumi tarjuman Rajendar choudhru ne kaha ”Riyasat mein ek mukammal jungle raj“ hai. har zila mein jaraim ke graph mein taizi aayi hai. har zila mein SP kaarkunoun ko nishana banaya ja raha hai. unhoun ne kaha ke BJP qaideen riyasat mein mujrim anasir ko sarparasti day rahay hain.
Samaaj vadiyoun ne Unnao ismat darri maamla ke mulzim Kuldeep singh Sengar ko Uttar pradesh se bahar ki jail mein muntaqil karne, sonebhadra zila ke Ambaha gaon ke qabiloun ko araazi allot karne aur mehsoolat ke record mein unke naam darj karne ka mutalba kiya hai.
Mutalibaat ki fehrist mein sonebhadra qatal-e-aam case ke mulzimoun ke muqadme ki samaat ke liye fast track adalat ke qiyam ka mutalba bhi shaamil hai.
Akhilesh yadav ne kaha ”Yogi Adtihyanath hukoomat ke daur mein, riyasat bhar mein qatal ke 729, ismat dari ke 803, loot maar ke 799, daketi ke 60 aur aghwa ke 2500 waqeat hue hain. Riyasat mein ”Jungle raj “ ghalib hai. agar BJP hukoomat ke mann maani rawayya ko nahi roka gaya to riyasat inteshaar ka shikaar hojayegi.
unhon ne mazeed kaha ke zilai hukkaam ko 25 nakati memorandum soumpne se qabal party ke tamam arakeen parliment, arkaan assembly, ohdedaran aur karkun collectrate mein juloos nikalenge aur dharna munazzam karenge. –YTN STAFF