Lucknow: Samajwadi Party (SP) ke sadar Akhilesh Yadav ne kaha hai ke shehriat (tarmeemi) qanoon ke khilaaf riyasat mein hue ehtijaj ke douran jin afraad ke khilaaf muqadmaat darj hue hain agar un ki hukoomat banti hai to hukumat un muqadamat ko khatam kardegi.
Yadav ne aaj elaan kiya ke utar pardesh mein 2022 mein unki party ki hukoomat ban’nay par shehriat (tarmeemi) qanoon wo NRC ke khilaaf ehtijaj karne walon par darj muqadmay khatam kardiye jayenge. Unhon ne assembly intikhabaat mein choti partiyon ke sath ittehaad ke bhi isharay diye. Choti partiyon ke liye Samajwadi party ne apne darwazay hamesha khulay rakhay hain. Unhon ne daawa kiya ke aglay saal assembly intikhab ke baad SP ki hi hukoomat banaygi. yahan is baat ka tazkara bhi qabil-e-zikar hai ke aaj shayar Munawar rana ki beti Sumaiyya rana ne samaajwaadi party mein shamoliat ikhtiyar ki. Lucknow ke ghanta ghar par CAA wo NRC ke khilaaf honay walay ehtajaji muzahiron mein Sumaiyya ne kaafi kaleedi kirdaar ada kiya tha. Is zimn mein un par bhi muqadma darj hai.
Samajwadi party mein aaj Gondah se BSP ke parlimani umeed waar rahay masood aalam khan, BSP ke laal Chandar gautam khudram paswan samait kayi leadran ne shamoliat ikhtiyar ki. Akhilesh ne kaha ke deegar tamam partiyon ke qaideen unki party mein shaamil horahay hain aur bohat se log shaamil hona chahtay hain. kayi choti partiyan hum se munsalik hona chahti hain is liye party 2022 intikhab ke baad choti partiyon se mil kar hukoomat banayegi.