Riyadh: Saudi Arab ney salamti council ki ghair mustaqil nashist ke liye UAE ki himayat kar di hai. Yaad rahay ke Emirate 23.2022 ke liye salamti council ki ghair mustaqil nashist ki rukniat ka umeed waar hai. Saudi Arab ney tamam mulkoun se kaha hai ke wo is silsilay mein Emirate ki himayat karen.
Saudi khabar-rasan idaray ke mutabiq aqwam mutahidda mein Saudi safarati mission ke naib sarbarah Dr Khalid Manzalawi ne aqwam mutahidda mein China ki sarbarahi mein honay walay Asian aur behar ul kahal group ke video ijlaas se khitaab karte hue kaha ke Saudi Arab, UAE ke aitdaal pasandana nuqta nazar se ittafaq karta hai.
Unhoun ney kaha ke Emarat ke duniya bhar mein aman o salamti ke qiyam ke liye hamesha pesh pesh rehta hai. Dr Khalid ney kaha ke Emarat ney paidaar taraqqi, Aman o salamti aur aalmi taawun se gehra talluq rakhnay walay ahem masail ke hal mein kamyabi haasil ki hai. Unhoun ney mazeed kaha ke Emarat, Mashreq Wasti nahi balkay poori duniya mein paidaar aman ke qiyam ke liye aqwam mutahidda ke sath bharpoor taawun kar raha hai aur insani masail ke hawalay se poori duniya mein wazeh nuqoosh chod raha hai.
Aqwam mutahidda mein Saudi safarati mission ke naib sarbara ne kaha hai Emarat neh hamesha rava daari ke Culture aur aman ke pegham ko farogh diya hai. Tanaziaat ko pur aman tareeqoun se tey karne wali sefatkari ko apni pehchan bana rakha hai. Dr Khalid neh bayan mein ye bhi kaha ke Emarat neh hamesha mushtarqa jad-o-jehad ki pabandi ki hai, Aqwam mutahidda ke manshoor ka ehtram kiya aur kaseer friqi sefartkari ko farogh dainay mein bharpoor hissa liya.