New Dehli: Malegaon dhamakay ki mulzim aur Bhopal se BJP ki rukan parliament Sadhvi Pragya Singh Thakur ne charshube ko Log Sabha mein Mahatma Gandhi ke qaatil Nathuram Godse par behas ke douran Log Sabha mein Godse se ko Muhib-e-watan keh kar ek neya tanaza khada kar diya. Un ke is bayan ke baad parliament mein zabardast hungama barpaa hogaya.
Is par congress party ke sabiq sarbarah Rahul Gandhi ne zafrani jamaat ki rukan parliament Pragya Thakur par shadeed taqeed ki aur Pragya Thakur ko ”dheshat gard“ qarar diya. Rahul Gandhi ne Twit kiya ke ”Pragya Singh Thakur ne dehshat gard Godse se ko Muhib-e-watan kaha hai. ”Hindustani parliament ki tareekh ka ek afsoosnaak din hai.
Is se pehlay hi, BJP ne Bhopal ki mutanazia rukan parliament Pragya singh Thakur par sakht narazgi ka izhaar kiya aur parliament ke surmaee ijlaas mein apni parliamani party ke ajlasoun mein shirkat par pabandi aed kar di aur markazi wazeer-e-difaa Rajnath Singh ki sarbarahi mein mushawarti committee se bhi inhen hata diya.
Ye pehla mauqa nahi hai, Jab Pragya Thakur ne tanaza khada kiya ho. Is saal munaqidah aam intikhabaat ke douran, Unhoun ne Nathoram Godse ko ”Muhab-e-watan kaha tha. Jis par wazeer-e-Aazam Narendra Modi ne narazgi zahir karte hue kaha tha ke wo inhen kabhi maaf nahi karen ge. Is ke ilawa Himant Karkare ke talluq se bhi anhoun ne mutanazia remarks kia tha. –YTN STAFF