New Delhi: Hindustani cricket team ke sabiq master blaster Sachin tendulkar ney world cup ke ikhtataam ke baad 11 apni rukni team ka intikhab kiya hai jis mein english wicket keeper Jonny Bairstow ki hindustani sabiq captain aur wicket keeper MS Dhoni par tarjeeh di gayi.
Isi tarhan qiyadat ke maamla mein bhi Virat kohli bhi pehli pasand nahi rahay balkay sachin ney newzealand ke captain Kane Williamson ko hi apna captain banaya hai. Sachin Tendulkar ney apni 11 rukni world team mein paanch hindustani khiladiyoun ko muntakhib kiya hai jis mein Virat kohli, Hardik Pandya , ravinder jadeja aur Rohit sharmaa shaamil hain.
Rohit sharmaa jinhon ney world cup Tournament mein sab se ziyada runs score kiye hain jaisa ke unhon ney 648 runs ke sath pehlay maqam par Faiz rehne ke alawa paanch centuries bhi score ki hain lehaza sachin ney Rohit sharmaa ko jani Bairstow ke sath apni team mein ba-hasiat opener shaamil kiya hai jabkay number 3 par kane Williamson ba-hasiat captain moujood hain.
Dilchasp haqeeqat yeh bhi hai ke sachin ney number chaar par Virat kohli ko muntakhib kiya hai jabkay world cup ke aaghaz se qabal hindustani team ka sab se bada masla number 4 par pur etemad batsman ko khilaney ka tha aur world cup ke douran yahi masla team ke liye tashweesh ka baais raha. all roudners ki fehrist mein shakib al Hasan , ben stokes , hardik pandya aur ravinder jadeja bhi sachin ki team mein shaamil rahay.
ODI mein sab se ziyada runs bananay walay sachin ney apni world team ke bowlers mein Jasprith Bumrah ke sath Australia ke baen haath ke fast bowler Mitchel Starc ko shaamil kya hai jabkay Jofra archer teesray fast bowler banay hain. sachin ki muntakhib 11 rukni world cup team un khiladion par mushtamil hain. Rohit sharmaa, Jonny Bairstow( wicket keeper ), Kane Williamson( captain ), Virat kohli, shakib al Hasan , Ben stokes, Hardik pandya, ravinder Jadeja, Mitchel starc jasprith bumrah aur Jofra archer. –YTN STAFF