Hyderabad: Modi hukoomat mein kahin bhi, kabhi bhi aur kuch bhi ho sakta hai aur koi ghair yaqeeni nateeja bhi aajay to ab awam aur khaas kar aqliyaton ko koi haerani nahi ho rahee hai kyunkay aaye din aam jurm karne walay mulzimon ko ba izzat bari kiya ja raha hai aur isi tanazur mein pehlu Khan muqadmay mein hue faislay se koi haerat nahi hui lekin mayoosi zaroor hui hai. alwar district adalat ney 14 august ko pehlu Khan hujumi tashadud muqadma mein sabhi 6 baaligh mulzimin ko bari qarar dey diya. additional zila wo session judge justice Sarita Goswami ney paish kiye gaye sabhi sabuton ko tasleem karne se inkaar kar diya. is faisla se pehlu Khan ke ahal-e-khanah aur aqliati tabqa mein mayoosi phailna fitri amar hai. unhein aisa mehsoos ho raha hai jaisay pehlu Khan ko kisi ney nahi mara. halaanke pehlu Khan ke hujumi tashadud ka video do saal pehlay hi viral ho gaya tha aur is video ki bunyaad par police ney saboot jama kiye they lekin jin logoun ko mulzim banaya gaya tha, woh sab bari kar diye gaye hain. adalat ney saaf lafzoun mein unhein bari kar diya hai lekin awam ke dilon mein yeh sawal ab baar baar uth raha hai ke kiya waqai pehlu Khan ko kisi ney nahi mara?
Darasal pehlu Khan hujumi tashadud maamla mein 9 afraad ko mulzim banaya gaya tha jin mein 6 baaligh they aur 3 na baligh shaamil the, adalat ney 6 baaligh mulzimin ko bari kar diya aur 3 na baligh mulzimin ki samaat court mein kiye jaaney ka faisla sunaya. is faisla par awam ka sakht radd-e-amal aana shuru ho gaya hai. Ek taraf jahan Rajasthan ke chief minister ashok Gehlot ney pehlu Khan hujumi tashadud ke sabhi mulzimin ko bari kiye jaaney ke baad zila wo session adalat mein appeal dair karne ki baat kahi hai, wahein doosri taraf Swara Bhaskar jaisi Maroof hastiyon ney additional district and session judge ke is faisla par haerani zahir ki hai. halaanke hindutva zehniat ke log adalat ke is faisla par jashn mana rahay hain. Ashok Gehlot ney pehlu Khan hujumi tashadud maamla mein adalti faisla sadir honay ke baad kaha ke is muamlay mein tamam mulzimin ko bari karne ke faislay ke khilaaf woh appeal karenge.
Gehlot ney 14 august ko hi is talluq se tweet kiya tha jis mein unhon ney likha ke hum ney hujumi tashadud ke khilaaf isi mahinay ke pehlay haftay mein qanoon banaya hai. hum marhoom pehlu Khan ke khandan ko insaaf dilanay ke liye pur azm hain. is silsilay mein Gehlot ney 15 august ko bhi tweet kiya jis mein unhon ney likha hai ke hamari hukoomat ney soch samajh kar is ( hujumi tashadud ) qanoon ko mazoor karwaya hai aur jald hi yeh nafiz hojayega aur pehlu Khan muamlay mein bhi hukoomat ney faisla kiya hai ke hum wapas appeal karenge .
Maroof filmi hasti aur samaji karkun Swara Bhaskar ney to adalat ke faislay ko intahi sharamnaak qarar diya. unhon ney is faisla par radd-e-amal zahir karte hue tweet kiya ke be-had sharamnaak. yeh Lynching poori tarhan camera mein qaid hui hai. hum aisi riyasat mein rehtay hain jo charon taraf se sharpasndi se bharpoor hai. qanoon, aeen aur yahan tak ke sabhi saboot be maienay nazar aa rahay hain. yeh tareekhi daur hai. bollywood hidaayat-car ney bhi pehlu Khan maamla mein adalti faisla par narazgi ka izhaar kiya. unhon ney apne tweet mein likha ke in dinon mujhe samajh nahi aa raha ke mein mayoos hon, gussa karoon ya phir na umeedi mehsoos karoon.
wazeh rahay ke Haryana ke zila Nooh ( Mewat ) ke rehne walay Pehlu Khan ek diary chillatay they. woh 1st April 2017 ko bhains kharednay ke liye Jaipur gaye lekin ziyada doodh milnay ki umeed par gaayi khareed li. inhen alwar mein hindu tanzeemon se wabsta aur mubayyana gaow rakshako ney ghair liya aur un ki pataayi ki. waardaat mein pehlu Khan ko shadeed zakhmi hue, unke alawa unke betay sameit 5 afraad bhi zakhmi hoye the. ilaaj ke douran hospital mein pehlu Khan zakhamo ki taab nah laa sakay aur chal basey.
Hujumi tashadud ke is waqiya ke khilaaf pooray mulk mein ehtajaji muzahiray hue aur kayi samaji karkunaan wo tanzeemon ney is tarha ke waqiya ki shadeed alfaaz mein mazammat ki lekin kuch hindutva zehniat ke logon ney shar pasand anasir ka hosla badhaane ka kaam kiya . is darmiyan ek fact finding ( haqayiq ka pata chalanay ) team ney Mewat ka dora kar kuch aisi batain samnay layein jis se zahir hua ke police poooray muamlay ko dabanay aur mulzimin ko bachanay ki koshish kar rahi hai. is fact finding team ney kuch na-kaat paish kiye jo is tarha hain.
FIR ke mutabiq police ko Pehlu Khan ke qatal ka pata 2 April ko subah 4:24 minute par hua. tahaqeeq karne par paaya gaya ke waqiya 1st April shaam 7 bajey ka hai. jaye waqiya se police station ka faasla mehez 2 kilo meter hai. FIR ke mutabiq police ko taqreeban 9 ghantay baad waqiya ki ittila haasil hui. FIR mein darj kiya gaya hai ke pehlu Khan ka bayan raat 11 baj kar 40 minute par record kar liya gaya tha. aisay mein sawal uthta hai ke jab police ko ittila hi agli subah chaar bajey haasil hui to phir bayan saadhay chaar ghantay qabal kaisay darj kar liya gaya. hamlay ke adhay ghantay baad police pehlu Khan aur un ke betay ko hospital le-kar gayi. jabkay FIR mein kisi chasham deed police ohdedar ka naam nahi hai. inhen muqadma mein gawah tak nahi banaya gaya.
Qabal az merg diye gaye apne bayan mein pehlu Khan ney 6 afraad ke naamoun ka tazkara kiya tha. pehlu Khan ke bayan ke mutabiq un par hamla karne walay keh rahay they ke woh Bajrang dal aur VHP ke arkaan hain. aisay mein sawal khada hota hai ke jab Pehlu khan is ilaqay ka rehaishi hi nahi tha to usay inhen 6 afraad ke naam yaad kis tarha reh gaye. aakhir kis ney usay yeh naam diye the police report mein kaha gaya ke pehlu Khan ke qabal az merg bayan ki jaanch ki gayi aur yeh paaya gaya ke 6 mulzimaan is waqt gow shala mein mojood they. tamam 6 mulzimaan ney tehqiqaat mein police ko yeh bataya ke jaye waqiya par unke mobile phone moujood nahi they aur police ney unke isi bayan ko saboot maan liya. tamam mulzimaan 5 mahinay tak faraar rahay aur achanak police ke paas aakar apne bayan record karate hue yeh inkishaaf karte hain ke woh jaye waqiya par mojood hi nahi they. yeh baat bhi police ki jaanch par sawalia nishaan lagati hai.
Behrod ke teen sarkari doctoroun ney bayan diya ke pehlu Khan ki mout un zakhmoun ki wajah se hui jo usay hamla ke douran lagey they. Police ney sarkari doctoron ki report ko nazar andaaz karte hue ek khangi hospital ( jis ke maalik BJP ke rehnuma aur markazi wazeer hai) ke doctoron ki baat sach maan li. BJP rehnuma ke dawakhanoun ke doctoron ney police ko bataya ke jab pehlu Khan hospital pohncha, to iski haalat theek thi. iski naak se khoon beh raha tha aur seenay mein dard ki shikayat thi. is bunyaad par doctoron ney pehlu Khan ki mout ki wajah harkat qalb ka band ho jana qarar day diya. un tamam bayanaat aur hujumi tashadud ka video viral honay ke bawajood adalat ki janib se jo faisla sunaya gaya hai iski wajah se pehlu Khan ke afraad-e-khandan mein ek qisam ki mayoosi payi jati hai to doosri janib sharpasandon ke hauslay aur bhi buland honge jo is tarha ke waqiyat ko anjaam dainay mein ab aur ziyada mutharrak ho saktay hain. –YTN STAFF