New Delhi: Uttarkhand aur Uttar Pradesh ke sabiq chief minister ND Tiwari ke betay Rohit shekhar Tiwari ke qatal mein ab naya modh aa gaya kyunkay police ne shak ki bunyaad par Rohit ki biwi aur do noukaroun ko hirasat mein le liya .
Rohit Shekhar ki mout par pehlay hi din se kayi sawalaat ho rahay they kyunkay unki mout mashkook halaat mein hui. shak is waqt yaqeen mein badal gaya jab post mortem report mein yeh inkishaaf hua ke unki mout ki wajah dil ka dora padna nahi tha. Rohit ke qatal ke maamla mein police ne unki ahliya Apurva Tiwari aur ghar ke do noukaroun ko hirasat mein liya hai aur zaraye ke mutabiq police ko shak hai ke Apurva Rohit ke qatal mein kisi saazish ka hissa ho sakti hai. is se qabal crime branch ke ahelkaar ne Apurva se aath ghantay tak pooch tach ki thi .
Wazeh rahay marhoom ND tiwari ki ahliya aur Rohit ki walida Ajula tiwari ne yeh kaha tha ke shadi ke baad se hi dono miyan biwi ke darmain rishtay achay nahi they. unhon ne yeh bhi kaha tha ke unko Shekhar ki mout ka yaqeen hi nahi aaraha hai aur unki zindagi ke liye yeh ek bada sadma aur jhatka hai. unhon ne kaha tha ke aisa kaisay ho sakta hai ke is din Rohit shaam chaar bajey tak sota raha .
Is maamla mein Rohit ke sasur aur Apurva ke waalid ne kaha tha ke unki beti is maamla mein begunah hai aur unki beti aur damaad ke rishtay bohat achay they aur inke darmiyan kabhi koi tanao nahi tha. ab police yeh pata laganay ki koshish kar rahi hai ke qatal jis ne bhi kiya ho lekin is qatal ki wajah kiya thi .- YTN STAFF