Hyderabad : City Police nay riyasat ke wazeer-e-aala KCR, un ke Farzand wo hukmaran TRS party ke car-guzar sadar K T Rama Rao, aur beti K. Kavitha, DGP Mahendar reddy aur deegar mumtaz afraad ko aaloda pani se bhari bottles bhejnay ki koshish karne walay shakhs ko girftar kar liya. mulzim ko Secunderabad post office mein lagaye gaye CCTV footage ki madad se girftar kiya gaya.
Iski shanakht Secunderabad ke rehaishi ke tor pa hui. police mulzim se pooch tach kar rahi hai, is ko shoba hai ke mulzim nay reyasti hukoomat ke hukmraanoun ko apne ilaqa mein aaloda pani ki farahmi ke baaray mein batanay ke liye is tarhan ki haerat angaiz harkat ka sahara lia hai.
Post office hukkaam nay mulzim se majmoi tor par 60 parcel haasil kiye hain. deegar Parcels par pattay nahi the. post office ke hukkaam nay wazeer-e-aala aur deegar ahem logoun ke pattoun ko parcel par darj karte hue dekha. tab inhen maloom hua ke parcels se badbo paeda ho rahi hai to unhon nay fori police hukkaam ko parcel ke baaray mein aagah kiya. aur jab police nay parcel khole to woh pani dekh kar haeran reh gaye. unhon nay shuru mein soncha tha ke yeh zahreela chemical bomb hosakta hai aur inhen test ke liye forensic laboratory bhej diya gaya. –YTN STAFF