Hyderabad: Telangana hukoomat ne riyasat bhar ke mukhtalif maqamat par baday pemana par Urban Forest ki tamer karte hue sarsabz o shadabi mein izafah ka faisla kiya hai. Is ka ahem maqsad kam maqam par ziyada pouday lagatay hue maholiyaat ka tahaffuz hai. Hukkaam GHMC ke ilaqa mein bhi aisay hi Urban Forest ki taamer ki tayari kar rahay hain. Yadadri Model ki shajarkari ke kaam pehlay hi yahan shuru kardiye gaye hain. Ye LB Nagar ki 10 aekar araazi par shuru kiye gaye hain.
Hukkaam nay Victoria Memorial Home Trust ke qareeb shejarkari ke kaam shuru kiye hain. Hukkaam nay yahan mukhtalif maqamat par mukhtalif qisam ke pouday laganay ka mansoobah tayyar kiya hai. Wazeer e taleem Sabita Indra Reddy aur Mayor B Ram Mohan nay yahan shejarkari ke programme ka aftetah kiya. GHMC ke ohdedaroun nay kaha kay is mah ki 31 tareekh taq 2 lakh pouday laganay ka kaam mukammal karliya jaye ga. Wazeer taleem aur Mayor GHMC nay Yadadri ki tarz ke Urban plantation ke liye yahan laaye gaye 51 aqsam ke poudoon ka muaina bhi kiya.