Riyadh: Saudi Arab mein Riyadh Royal Commission ke Executive Chairman Fahad Al Rasheed ne kaha hai ke Riyadh Metro ke baaz hissoun ka iftitah 2020 ke ekhtataam se qabal kardiya jaye ga. Unhoun ne mazeed kaha hai ke un dinoun dar-ul-hukoomat Riyadh mein 18 se ziyada baday mansoobay nafiz kiye jarahay hain. Riyadh ki abadi 15 million tak pohanchanay ka program hai.
Media se guftagu karte huve unhoun ney mazeed kaha ke baday mansooboun mein Metro, Al-Diriyah Gate, Qiddiya mansoobah, Riyadh Art aur Green Riyadh mansoobay shaamil hain. Al Rasheed ney kaha hai ke aindah 10 baras ke douran Riyadh mein 3 Trilion Riyal ki sarmaya kaari hogi jis se dar-ul-hukoomat mein maeeshat ka hajam badh jaye ga.
Fahd Al Rasheed ne kaha ke Saudi hukoomat baday mansooboun par 1 Trilion Riyal ka sarmaya lagaye gi. Riyadh ki abadi ka hajam badhaane ke liye naye makanaat bananay ke liye 1 trilion Riyal kharch hon ge jabkay abadi mein zabardast izafay se peda honay walay masail se nimatnay ke liye khangi idaara 1 trilion ki sarmaya kaari kere ga.
Abadi ke lehaaz se Riyadh is waqt duniya ka 49 wahn shehar hai. Yahan 70 lakh afraad abad hain. Riyadh muashi taaqat ke hawalay se duniya ka 18 wahn shehar hai. Ye tail ke masiwa qaumi pedawar ka 47 feesad se ziyada faraham kar raha hai.