Riyadh: Saudi Arab ke dar-ul-hukoomat Riyadh ke ek ilaqay se namaloom afraad ki 10 qabrain daryaft hui hain. Anjani qabroun ki daryaft ne poooray ilaqay mein khalbali macha di hai. Tafseelaat ke mutabiq Riyadh ki baldeati council ke rukan Ibrahim fahad Al Enzi ne kaha hai ke wo mashriqi Riyadh ka dora kar rahay they. Achanak ek ihatay ke andar 10 qabrain dekh kar herat zada reh gaye.
AL Enzi ne kaha hai ke ihatay ke 4 darwazay they lekin sab ke sab khulay hue they. Ye maqam Alenezi se 9 kelo meter mashriq mein waqay hai. Ziyada herat is waqt hui jab dobarah is jagah ka dora kiya to pata chala ke wo qabrain saari ki saari khuli hui then aur un mein kuch bhi nahi tha. Is se lagta hai ke is ke peechay koi raaz hai.
Al Enzi ne kaha hai ke mujhe herat is liye bhi hui ke ye ihata rehaishi mehloon aur wahan mojood factories ke qareeb waqay hai. Fori tor par mein ne karwai ki aur ek khat mein ne baldeati council ko likha. Council ne Riyadh Municipality ko is ki ittila di lekin ajeeb baat ye hai ke abhi tak is hawalay se koi karwai nahi hui. Waqeye ke baad 15 roz guzar chuke hain.
Ek haftay qabal mein ne Al Enzi police station mein report darj kara kar pooray waqea ki tafseelaat bhi pesh kar di then. Al Enzi ne kaha ke ye waqea aisa nahi jis par khamoshi ikhtiyar ki jaye. Waqea ki tehqiqaat ashad zurori hai. Unhoun ne shuba zahir kiya ke is mein ghair qanooni tarikeen ka koi haath ho sakta hai jahan ye achi khasi tadaad mein reh rahay hain. Ek andazay ke mutabiq un ki tadaad 10 hazaar se ziyada hogi. –YTN STAFF