Riyadh: Saudi Railway General Corporation ney kaha hai ke Dammam aur Riyadh ke darmain Railway Line dugni ki jaye gi jis se Cargo aur musafiroun ko badi sahoolat haasil hogi aur mojooda istedad ke muqablay mein 60 feesad ka izafah hoga. Media ney Railway Corporation ke hawalay mutala kiya hai ke aala darjay ki jadeed trains mein mazeed 6 ka izafah kiya gaya hai. Is ki badolat 2 hazaar se ziyada nashistoun ka ezafah huwa hai. Rozana ki bunyaad par 5 hazaar musafir train se safar karne lagey hain.
Jald hi 4 nai trains Riyadh Dammam Railway line par chalaye jayen gi. Dohri Railway line bichenay ki soorat mein Dammam Riyadh Railway mansoobah mukammal ho jaye ga. Railway Corporation ney Cargo ke liye 8 trains ka intizam kiya hai. Alawa azeen Cargo ke liye 220 Bogie ka moahida kar liya gaya hai. Yaad rahay ke Railway Corporation ke paas fil-waqt 102 trains hain jin mein se 87 khidmaat mein hain. Musafiroun ke Bogie ki tadaad 75 aur Cargo Bogie ki tadaad 2596 hai.