Hyderabad : Itwaar ke roz Rajendra Nagar mein sadak par ek Bag phatnay se hue ek dhamakay mein ek kachra uthane walay shakhs ki mout waqay hogayi.
Tafseelaat ke mutabiq shehar ke Rajendra Nagar ilaqa mein sadak par ek bag kholnay ki koshish karne par bag se hue dhamakay mein Ali Nami 35 sala shakhs shadeed zakhmi ho gaya, jisay Osmania hospital le jaya gaya jahan is ki mout hogayi.
PVNR express way ke neechay ek footpath par hue is dhamakay se awam mein khauf wo haraas phail gaya. cyberabad police commissionaire ne dhamakay ke muqam ka doura kiya. baad mein unhon ne media numaindon ko bataya ke ”yeh shoba hai ke yeh chemical dhamaka hai. hum iski tamam zawiyon se tehqiqaat kar rahay hain aur janney ki koshish kar rahay hain taakay is shakhs ne yeh bag kahan se Bar aamad kiya tha.
Forensic science laboratory ( FSL ) ki ek team ne dhamakay ke muqam se namoonay jama kiye hain. Insidaad-e-dehshat gardi unit ( octopus ) ke ohdedaron ne bhi is ilaqa ka doura kiya hai.
Ek police officer ne bataya ke woh is ilaqay mein mojood CCTV footage scan kar rahay hain, taakay yeh maloom kar saken ke is kachra uthane walay shakhs ne yeh bag kaha se Bar aamad kiya tha. –YTN STAFF