Thiruvanthapuram: Haliya dinoun mein yeh paish qiyasiyan zor pakar rahi theen ke Congress ke sadar Rahul Gandhi Uttarpardesh mein Amethi ke alawa Junoobi Hindustan mein Kerala ki lok sabha nishist Wayanad se bhi intikhabaat ladhinge . aaj un paish qiyaasi ka khtama ho gaya hai aur bal akhir Rahul Gandhi Amethi ke alawa Wayanad se bhi lok sabha intikhabaat mein apni qismat aazmayin ge. yahan ek press conference mein media numaindoun se izhaar-e-khayaal karte hue Congress quaed AK Anthony ne elaan kiya hai Congress saddar Rahul Gandhi do nishistoun se intikhabaat ladhinge .
Wayanad Tamilnadu aur Kerala ke alawa karnataka ke liye bhi ek ahem nishist tasawwur ki jati hai kyunkay yeh Kerala aur Tamilnadu ki sarhad par moujood hai. guzishta chand dinoun se Kerala congress ke senior qaideen saddar congress Rahul Gandhi ko Wayanad se intikhabaat mein hissa lainay ki sifarish kar rahay they jis par Rahul Gandhi ne kayi dinon se khamoshi barqarar rakhi thi lekin aaj bal aakhir yeh wazeh hogaya hai ke Rahul Gandhi Uttarpardesh mein Amethi aur Kerala mein Wayanad se intikhabaat ladhinge.
media conference ke douran jab sawal kya gaya ke kiya Rahul Gandhi ko Amethi se kamyabi ka yaqeen nahi hai to is par congress ke tarjuman Randeep soreej wala ne kaha ke nrindr moodi ne gujrat bhi to choda hai aur woh varansi se intikhab lad rahay hain lehaza is tarha ka sawal karna mazhaka khaiz tabsarah hoga .
Rahul Gandhi ke Wayanad se intikhab larnay ke faislay par siyasi gooshoun se miley jalay radd-e-amal arhay hain kyunkay aik gooshay ka maanna hai ke Rahul Gandhi ka Junoobi Hindustan se intikhab larna congress ko taqwiyat day ga aur congress arkaan mein naya josh paida kar ga to doosri janib Kerala ke cheif minister Pinarayi Vijayan ne kaha hai ke Wayanad se Rahul Gandhi ka intikhab ladna behtar nahi kyunkay agar woh BJP ko apna asal hareef mantay hain to inhen BJP ke kisi gadh se intikhab ladna tha. unhon ne mazeed kaha ke LDF mein itni salahiyat moujood hai ke woh Wayanad se Rahul Gandhi ko shikast day gi .– YTN STAFF