Kerala: Kerala mein Congress ne All India Congress Committee ke sadar Rahul Gandhi ka naam viyaned Lok Sabha ki nishist se tajweez di hai aur khwahish ki hai ke Rahul gandhi is nishist se lok sabha intikhabaat laden. Kerala ke senior qaideen ne kaha ke Rahul gandhi se mazkoorah nishist par lok sabha intikhabaat ladney ki khwahish ki gayi hai, lekin Rahul gandhi ki janib se hunooz jawab nahi aaya hai. yahan media numaindoun se izhaar-e-khayaal karte hue All India Congress Committee ke general secretary Chandi Oman ne kaha ke Kerala pradesh congress committee ne Rahul gandhi se khwahish zahir ki hai ke Wayanad ki nishist se lok sabha intikhabaat laden .
Unhoun ne mazeed kaha ke yeh congress party ka mutalba hai ke Rahul gandhi Junubi Hindustan se lok sabha nishist se intikhabaat laden aur hum ne un se darkhwast ki hai ke Wayanad se intikhabaat laden. kerala congress committee ki janib se ki jaane wali is khwahish par Rahul gandhi ki janib se hunooz koi rad-e-amal nahi aaya hai lekin Junubi hindostan se talluq rakhnay walay congressi qaideen ko umeed hai ke Rahul gandhi ki janib se misbet jawab aayega. Kerala mein congress 20 nishistoun mein se 16 nishistoun par intikhabaat lad rahi hai aur un 16 nashiston ke liye 14 naamon ki fehrist bhi jari kar di gayi hai lekin Wayanad aur Wadakara ki nishistoun par umeedwaroun ka abhi elaan nahi kiya gaya hai .
Rahul gandhi ko kerala se lok sabha intikhabaat mein umeedwaron ke tor par paish karne se mutaliq kayi senior qaideen jin mein ae ke Antony bhi shaamil hain, tabadlah khayaal kiya gaya hai. Rahul gandhi ki yahan se umeedwari Junubi Hindustan mein congress mein ek nai jaan aur tawanai daal sakti hai jis se lok sabha intikhabaat mein usay ziyada se ziyada nishitein haasil hosakti hain. congress ne pehlay Wayanad nishist se Siddiqui jo kay Kochi code a district congress committee ke saddar hain, un ka naam paish kiya tha, lekin unhon ne yahan se wapsi ikhtiyar ki. Siddiqui ne khud kaha hai ke woh chahtay hain ke Rahul gandhi is nishist se lok sabha intikhabaat laden. Aur karnataka Tamilnadu mein congressi qaideen aur ilaqai Sudoor ne bhi Rahul gandhi se darkhwast ki hai ke woh is nishist se muqaabla karen .