Hyderabad: Rajnath Singh ne kaha ke Hindustani fazaiya ke liye 10 September ek khaz din hai kyunkay aaj France se haasil kardah intahi jadeed aur asri jungi tayyaray Rafale ko bazabta tor par fazaiya mein shaamil karliya gaya. Asri jungi tayyaron ke Hindustani fazaiya mein shaamil karne ke sath hi wazeer difaa Rajnath Singh ke bayan mein jarhiyat apne urooj par rahi jaissa ke unhoun ne hareef aur khaas kar padosi mumalik ko dabey alfaaz mein sakht intibah day diya hai.
Hindustani fazaiya mein Rafale tayyaron ki shamoliat Hindustani wazeer difaa Rajnath Singh aur Francesi wazeer difaa Florence Parly ki mojoodgi mein amal mein aayi hai.
Hindustani shumali riyasat Haryana ke maqam anbalh mein waqay fazaiya ke Station mein ek shandaar taqreeb munaqqid hui jis ke douran 5 tayyaray fazaiya ke Golden Arrow Squadron ka hissa banay halaank un tayyaron ki Hindostan aamad 27 July ko hi hogayi thi.
Naye tayyaron ki Hindustani fazaiya mein shamoliat ke baad wazeer difaa Rajnath ne jarehana bayan diya aur padosi mulk China ke sath sarhad par jari kashedgi mein unhoun ne kaha ke Rafale jungi tayyaron se fazaiya ki taaqat aur salahiyat kayi guna badh gayi hai aur yeh asri tayyaray Hindostan ki taraf aankh uthany walon ke liye sakht pegham hai. Rafale ko Hindustani fazaiya mein shaamil karne ki taqreeb mein Air Force Station par mukhtalif mazahab ki ibadat ki gayi.
Rajnath neh apne bayan mein China aur Pakistan ko bil wasita tor par ek sakht pegham diya aur kaha ke aaj un tayyaron ka shaamil hona poori duniya khasosan hamari salamiyat ki taraf uthi nigahon ke liye ek bada aur sakht pegham hai. Hindustani sarhadoon par haliya dinon mein jis terhan ka mahol bana hai ya mein keh sakta hon ke yeh mahol banaya gaya hai is mahol mein un tayyaron ka shaamil hona hamaray liye bohat ahem hai.”