Hyderabad. Telangana Rashtriya Samiti hukoomat ki chaar sala karkardagi se aawam ko waaqif karwane munaqidah jalsa aam ” Praghathi Nivedhan” ki kamyabi ke baad TRS party teen din baad aik aur jalsa aam munaqqid karne ka iradah rakhti hai. Tawaqqu to yeh ki jarahi thi ke ” Praghati Nivedhan” mein hi Mr. K Chandrashekhar Rao Assembly ki tahleel ka elaan kar deinge magar aisa kuch bhi nahi huwa. Baaz logon ka yeh maanna hai ke Praghathi Nivedhan se aik din qabl huwi barshami taiz hawaon ke baayis Chief Minister ke qad e azam cutout ke ukhad kar zameen par girjane ko badshugoon mante huwe qabl az-waqat intekhabaat ke liye Assembly ki tahleel ke elaan ko moakhar kardiya gaya tha. Praghati Nivedana ke din hi munaqidah Cabinet Meeting mein yeh tye karliya gaya tha ke 6 September ko Cabinet ka aik aur ijlaas munaqqid kiya jaye ga. Ab maloom huwa hai ke 6th September ko Cabinet Meeting mein riyasati Assembly ki tahleel ka faisla karliya jaye ga aur dosray din zila Siddipet ke Husnabad mein aik aur jalsa aam munaqqid karte huwe is mein intekhabaat ka bagal baja diya jaye ga.