Delhi: Bhartia Janata Party ( BJP ) ne Punjab ke Hoshiarpur mein Bihar se talluq rakhnay walay mohajir khandan ki bachi ki esmat raizi ke waqea par Congress ke rehnuma Rahul Gandhi ki muzammat karte hue poocha hai ke Hathras mein ehtijaj karne walay Congress ke sabiq sadar Hoshiarpur kyun nahi jatay?
BJP ke rehnuma aur markazi wazeer Prakash Javadekar ne hafta ko ek bayan mein kaha Tanda mein Bihar ke Dalit mohajir mazdoor 6 sala beti ke sath zayad-ti ki gayi aur is ke baad qatal kardiya gaya. Yeh kitna takleef da aur sharamnaak waqea hai. Hum mutalba karte hain ke Congress hukoomat mujrimon ko giraftar kere aur sakht karwai kere.
BJP ke rehnuma Javadekar ne kaha ke Rahul Gandhi siyasi doray par Hathras jatay hain, Is ke bajaye inhen Punjab, Rajasthan jana chahiye. Un ki hukoomaton mein khawateen ke sath na-insafi ki jarahi hai, Un ke sath zayad-ti ki jarahi hai. Congress hukoomat wali riyasat Punjab mein Tanda ki beti ke ghar walon se mulaqaat nahi ki. Nah to Rahul Gandhi Tanda gaye aur nah hi Priyanka Gandhi ne yahan ka dora kiya hai. Congress ki sadar Sonia Gandhi ne bhi is waqea par koi bayan nahi diya hai jis ki muzammat ki jati hai. Is ke ilawa Bihar mein Tejashwi Yadav ki tawajah is simt mabzol karwai gayi aur un se mutalba kiya gaya ke woh Bihar ki beti ko insaaf dilwanay ke iqdamaat kere?
Alawa azeen BJP ke Senior leader aur markazi wazeer Nirmala Sitharaman ne media conference mein kaha ke Hoshiarpur mein Bihar ke khair muqeem mazdoor ki 6 saal ki beti ki aabro reezi karkay usay qatal kardiya gaya aur laash ko jalanay ki koshish ki gayi. Is sharamnaak waqea par Congress ki khamoshi takleef da hai. Unhoun ne kaha ke har masla par Tweet karne walay Congress Leader Rahul Gandhi ne is masla par dhai din guzar jane ke baad bhi koi Tweet nahi kiya.