Abu Dhabi: Chouthay maqam par mojood Kings XI Punjab satwen maqam ki team Rajasthan Royals jummay ko IPL ke 50 wi match mein Playoff mein apni umedon ko barqarar rakhnay ke iraday se maidan mein utrain ge.
IPL filhal apne faisla kun marhalay mein hai aur har match har team ke liye ahem hota ja raha hai. Punjab musalsal 5 match jeetnay ke baad points table mein chouthay number par pahonch gaya hai jabkay isi team ne apne pehlay 7 matches mein sirf ek match jeeta tha. Punjab ne Table mein nichle maqam se herat angaiz wapsi ki hai aur ab woh chouthay number par hai aur ab team Playoff mein jagah ki talaash mein hai.
Punjab 12 matches mein 6 fatohat, 6 nakamiyoo aur 12 points ke sath chouthay number par hai. Team ko Playoff ke liye baqi dono match jeetnay hon ge. Rajasthan 12 matches mein 5 fatohat, 7 shikast aur 10 points ke sath satwen number par hai.
Rajasthan ke liye baqi 2 Matches mein kamyabi haasil karna zaroori hai aur 14 points par tehar kar Playoff ke liye kuch teams ke sath muqaabla karne ki umeed hai jahan Net Run Rate teams ki taqdeer ka taayun kere ga. Rajasthan ko nah sirf apne baqi Match jeetna hai balkay apne Run Rate mein bhi numaya behtari lani hogi.
Punjab ne apne pichlle match mein Kolkata Knight Riders shikast di thi jabkay Rajasthan ne Mumbai Indians 8 wickets se shikast day kar apni umeedon ku barqarar rakha tha. Rajasthan ke baad Punjab apna aakhri League Match Chennai Super Kings ke sath khailay ga aur Rajasthan Kolkata Knight Riders khilaaf khailay ga. Dono match etwaar ko khailay jayen ge.
Punjab ne apne aakhri 5 matches mein Bangalore ko 8 wicket se, Mumbai Indian ku dosray Super Over mein, Dehli Capitals ku 5 wicket se, Hyderabad ko 12 runs se aur Kolkata ko 8 wickets se shikast di hai. Is Form ki bunyaad par Punjab ko jeetnay ka dawaydaar tasleem kiya ja raha hai lekin is baar Tournament mein bohat si masawaat tabdeel hogai aur aakhri gaind tak kuch nahi kaha ja sakta.
Punjab ke Captain KL Rahul ne kaha ke mein aur poori team bohat khush hon. Yeh woh cheez hai jis ko hum sab mil kar karna chahtay thay. Ground mein jaakar misbet cricket khelna. Hum sab ko yaqeen hai ke soorat-e-haal hamaray haq mein hosakti hai. Musalsal 5 jeet, Yeh poori team ki koshish ka nateeja hai, Yeh sirf 1 shakhs ki mehnat nahi hai. Batting achi thi, Bowling bhi achi thi. Hum ne pooray Tournament mein bohat achi Fielding ki. Mujhe khushi hai ke sab kuch theek chal raha hai aur hum 2 aur match jeet satke hain.
Rajasthan ke Captain Steven Smith Mumbai ke khilaaf 8 wicket ki jeet se hosla azfa hai aur un ka khayaal hai ke is jeet se team ka hosla wapas agaya hai. Smith ne kaha ke woh is jeet se bohat khush hain aur team is jeet ki talaash mein hai. Unhoun ne kaha ke mein bohat khush hon. Hum is fatah ki talaash mein thay. Mujhe umeed hai ke hamaray Batsman’s ko is match se aetmaad miley ga aur is se inhen mazeed match jeetnay mein madad miley gi.
rajsthan aur Mumbai ke mabain aakhri league match 27 September ko Sharjah mein sun-hwa tha jis mein rajsthan ne chaar wicketon se kamyabi haasil ki thi lekin is ke baad Punjab ki team ki form achi nahi thi jab ke is waqt Punjab behtareen form mein dikhayi day rahi hai.