Maharashtra aur Chattisgarh Police ki Telangana Police ke taawun se kaarwaai- Huqooq e Insaani Jahedkaar ko naamaaloom muqam par muntaqil kardiya gaya.
Hyderabad- Maharashtra, Chattisgarh aur Telangana ki khususi Police teams ne aaj mushtraka taur par maaroof Huqooq e Insaani Jahedkar wo APCLP leader Prof. Vara Vara Rao aur un ki dukhtar aur deegar ki rihayeshgahon par chaape mare- Yeh chaape Pune Police ki jaanib se darj kardah ek muqadama ke silsile mein kiye gaye hain jis mein Pune Police ne id-dia kiya tha ke uss ne Wazeer e Azam Narendra Modi ko halak karne Dalit qayedeen aur Maoist ki ek saazish ko benaqaab kiya hai- Pune Police ne muqaami Adalat ko guzishta June mein waaqif karwaya tha ke usae Bhimakore Gaon tashadud muqadama k eek mulzim Delhi ke ek jahedkaar Rona Jacob Wilson ki Computer mein ek maktoob dastyaab huva tha, Comrade Prakash ke mausuma is maktoob Modi ki zair e qayadat BJP ki 15 riyasaton mein kamyaabi par tashweesh ka izhaar kiya gaya tha aur 8 crores maaliyat ke aslaha wo gola barood ke husool ka zikar kiya gaya tha, Police ne id-dia kiya ke iss maktoob mein is baat ka izhaar kiya gaya ke “hum Rajiv Gandhi nauwiat k eek aur waaqia ke khutoot par gaur kar rahe hain.’’ Maktoob mein mazeed kaha gaya ke “ un ke (Modi) Road Show ko nishana banana maussir hikmat e amali ho sakti hai.’’ Bataya Jata hai ke Pune Police ke tafteeshi ohdedaaron ne Jacob Wilson ke zabt shuda laptop se ikattha kardah data se mazeed ahem maalumaat jama ki hain aur iss saazish mein maali muawinat karne walon ke naamon ka bhi pata chalaya hai. Pune aur Chattisgarh ki Police ne Telangana ki Task Force Police ke hamrah Search Warrant ke saath Prof. Vara Vara Rao ke Gandhi Nagar apartment mein tlashi li hai- Aisi hi talashi karrawaai bayak waqt Prof. Vara Vara Rao ki dukhtar ki rihayeshgah, IEFL k eek Professor ki rihayeshgah waqae Nagole aur do sihaafion ki rihayeshgah aur APCLC ke do hamdardon ki rihayeshgahon par bhi ki gai. Samjha jata hai ke Pune aur Chattisgarh ki Police ne Prof. Vara Vara Rao par Maoist ke liye maalia ikattaha karne ka shuba kar rahi hai take Modi ko halak karne ki saazish ko amali jaama pahenaya jaasake. Bataya jata hai ke chapa maarte huve Police ne unn ke gahr ki tamaam telephones ko apne qabze mein leliya take wo bahar kisi se raabita qaayim na kar saken. Yeh bhi maaloom huva hai ke Prof Vara Vara Rao ko naamaaloom muqaam par muntaqil kardiya gaya hai jabke un ki rihayeshgah par Police ki taftishi karrawai jaari hai. Samjha jata hai ke Porf Vara Vara Rao ko Pune ki Adalat mein paish kiya jaayega jahan yeh muqamma zair e dauraan hai. Maaloom huva hai ke Chattisgarh Police ne bhi Maoists ke khilaaf darj muqadammat mein Prof Vara Vara Rao ko maakhooz ki hai. Prof Vara Vara Rao ke khilaf karrawai par Huqooq e Insaani ke Jahedkaaron ne sakht tashweesh ka izhaar karte huve is ki muzammat ki hai.