Hyderabad. Sadar Telangana Jana Samithi Professor Kodandaram tawaqqa hai ke Telangana Assembly ke chand halqon ke liye Party umeedwaron ka elaan mah September mein kar deinge. Barsar e iqtedar Telangana Rashtra Samithi aur badi oppostion party Congress ney bhi pehlay hi yeh elaan kardiya hai ke woh September mein Party ke umeedwaron ka elaan kar deingi. zaraye ke mutabiq Telangana Jana Samithi (TJS) ke sarbarah par zabardast dabao hai ke mukhalif TRS votes ki taqseem ko roknay doosri hum khayaal partiyon se intikhabi mafahmat ki jaye. Party zaraye ney inkishaaf kya hai ke chand qaayedeen, intikhabi mafahmat ke haq mein hain aur unhen yeh mahswara bhi dae rahay hain ke woh Telangana Riyasat mein mukhalif TRS partiyon ka aik riyasti satah ka wifaq tayyar kere taham is soorat mein Telangana Jana Samithi ko baa-mushkil 20-25 nashiston par hi iktafa karna padega aur yeh pehal doosri partiyon ki janib se umeedwaron ke elaan se qabal hi karna padegi jis ke imkanaat mohom nazar arahey hain chunkay Congress Party bhi Telangana mein tanha muqaabla karne ke darpay hai. Telangana mein Lef Parties aur Telugu Desam Party ka bhi muaqqaf koi behtar nahi hai.