Hyderabad. Barsar Iqtedar Telangana Rashtra Samiti ke siyasi taaqat ke muzahira ke liye 2nd September ko munaqqid shudni Pragathi Nivedana ki tayyariyan shor wo zor se jari hain. Jalsa gaah ke muqam aur is ko janay walay tamam raastoon ko gulaabii parchamon, banners,hoardings aur cut-outs se nahla diya gaya hai magar banners waghera par Urdu nadarad aur Muslim qayedeen nazar andaz kar diye gaye hain. Hatta ke Deputy Chief Minister Mr.Mahmood Ali ki bhi tasweer kahin dikhayi nahi par rahi hai. Pragati Nivedana ki taiyarion se Muslim qayedeen ko badi had tak daur hi rakha gaya tha sirf Deputy Mayor Mr. baba Fasihuddin hi kisi had tak un taiyarion se judey rahay, shayed is ki aik wajah yeh bhi hosakti hai ke woh GHMC se wabasta hain. Muslim qayedeen is jalsa aam ke baray mein is waqt harkat mein aeye jab akhbarat aur television ke zareya inhen is programme ka pata chala. Agarchay aaj kuch Corporations aur Boards ke Sudoor ne akhbaari numayindon ke hamrah jalsa gaah ka mushahida kya hai magar aisa lag raha tha ke woh muntazmeen mein se nahi hain balkay woh khud mushahida karne aeye hain. Yeh bhi maloom huwa hai ke Pragati Nivedana se khitaab ke liye sirf aik Muslim qayed ko mauqa diya jaye ga. Yaad rahay ke TRS Mulk ki tareekh ke sab se baday siyasi muzahira ke liye Outer Ring Road ke qareeb Kongara Kalan mein ,1600 acres arazi ka intikhab kya gaya hai. Gadiyon ki parking ke liye 1000 acres araazi ka raqba mukhtas kya gaya hai. Chief Minister wo sadar TRS Mr. ke Chandarshekar is jalsa mein taqreeban 4 ghantay khitaab karte hue TRS hukumat ki chaar sala karkardagi ka jayeza paish karenge. Samjha jata hai ke TRS is jalsa aam se riyasat mein apna intikhabi bagal baja degi aur Mr. Chandrashekar Rao tawaqqa hai ke Party umeedwaron ka bhi elaan kar deinge taakay woh abhi se intikhabi tayarion mein jut jaayein. Chief Mnister ne ab tak jo isharay dyie hain is se aik siyasi gosha mein yeh qiyaas aarayyan ki jarahi hain ke Mr. Chandarshekar Rao is jalsa aam mein hukumat tahleel karte hue naya khat e etemaad haasil karne ka elaan kar saktay hain. Party sargarmion se Muslims ko door rakhnay aur Urdu zabaan ko yaklakht nazar andaaz kar diye janay par Muslim halqon mein yeh chay-megoyaan honay lagi hain ke kahin yeh sab BJP se TRS ki khurbat aur khufia mafahmat ka nateeja to nahi hai?