Hyderabad: Police ki awam dost shanakht par hamesha se hi sawalia nishaan raha hai lekin ab haliya waqeyat ke baad yeh sawalia nishaan mazeed gehra hogaya hai kyunkay circle inspector ki janib se Police station mein apne cabin mein khangi Contractor ki saalgirah ki taqreeb manana aur is taqreeb ka video tayyar karna awam mein be cheeni ka sabab bana hua hai halaanke commissionaire of police V B Kumalasan Reddy nay is waqeye ki tehqiqaat ke liye karwai ka aaghaz kardiya hai. tafseelaat ke mutabiq Mana kundur circle inspector Indra Sena reddy ney police station mein apne hi chamber mein ek khangi Contractor ki saalgirah manayi hai. Indra Sena reddy ney rawan haftay ek khangi Contractor Nila Ravinder reddy ki saalgirah taqreeb apne Chamber mein mananay ke alawa raat mein hui is party ka video bhi banaya tha jo dekhte hi dekhte social media par viral ho gaya jis ke baad commissionaire aur police Kamlasan Reddy ney is waqeye ki tehqiqaat ka hukum diya hai .
Additional DCP Srinivas aur Karimnagar Rural ACP Usha Rani se mutalba kiya gaya hai ke woh is waqeye ki tehqiqaat karen jis ke baad ACP ney mana Kundur police station ka dora karte hue yahan manayi janay wali saalgirah taqreeb ki tafseelaat haasil ki. police zaraye ke mutabiq Indra sena reddy maazi mein bhi kayi ek tanazuath mein mulawis rehne wala naam hai. Ek janib police ke Aala ohdedar mehakma ko awaami dost bananay ke liye koshan hain to doosri janib aeye din aisay waqeat jis mein chand police ohdedaron ki maldaar afraad aur asr wo rasookh rakhnay walay logon ke liye naram gosha aur un ke sath uthnay bethnay ki tafseelaat social media par anay ke baad aam log police ohdedaron ko awam dost maanne se inkaar karte hain .
2 mah qabal yahan ek aisa hi waqea samnay aaya tha jis mein Gangadhara police station ka ek head constable arazi ke tanaza mein ek khaas group ki himayat kar raha tha. is ke alawa ek aur waqea mein home guard jo ke Huzoorabad circle inspector ke driver ki khidmaat anjaam day raha tha woh bhi Gambling mein mulawis paye janay ke baad moattal kar diya gaya. aeye din police ke ahem ohdedaron ki janib se khaas afraad aur khaas tabqa ki himayat karne ke baad ghareeb awam ka mehakma police aur chand police ohdedaron par se etemaad bilkul uth chuka hai. –YTN STAFF