Hyderabad : kurrah arz par aisi koi jagah nahi hain jahan plastic zarraat moujood nahi hain. samandar ki geherai se lekar saahil samandar ki reth, pani ki bottle se lekar khanay ke packets aur raastoun par plastic ya iske zarraat mojood hotay hain aur to aur jis hawa mein hum saans le rahay hain is mein bhi plastic ke zarraat is qader badh chuke hain ke jo saans hum le rahay hain is mein plastic zarraat ki moujoodgi ney hamein kayi khatarnaak khadshaat se dochar kardiya hai.
Kuch arsa qabal hi aalmi idaara sahet ( WHO ) sameit kuch mumalik ki tanzeemon ki janib ki jaaney wali tahaqeeq mein yeh baat samnay aayi ke duniya ka har baaligh shakhs salana 50 hazaar plastic zarraat nigal raha hai. aalmi idaara sahet ney bhi Micro-Plastic par haal hi mein ek mufasil report jari ki thi, jis mein bataya gaya tha ke Hawa, peenay ke pani aur ghizai ashya mein plastic ke zarraat ki mojoodgi se masail badh rahay hain.
Yahi wajah hai ke aaj kal Hindustan sameit duniya bhar mein plastic ke istemaal ki rok thaam ke liye kayi iqdamaat kiye jarahay hain aur badey shehron mein plastic ki thailiyon ke istemaal par pabandi aa-ed ki gayi hai. lekin ab dekhna yeh hai hukoomati iqdamaat se hatt kar awam, jo taqreeban 70 saal se apni roz marrah zaroriat se lekar baqi cheezon mein plastic ka be-daregh istemaal kar rahay hain, is hakoomati faislay par kis had tak amal karte hain lekin is sab se pehlay yahan yeh janna zurori hai ke duniya bhar mein plastic ke istemaal ko tark karne par zor kyun diya ja raha hai.
Plastic ek Polymer hai aur scienci istilaah mein Polymer ek jaisay jodoun ki zanjeer ko kehte hain. yeh Polymers ziyada tar carbon aur hydrogen ke jodoun se banay hotay hain. jabkay chand Polymer oxygen, nitrogen, sulfur, chlorine, fluorine, phosphorus aur silicone se bantay hain. Polymer mein mojood yeh johar aapas mein bohat ziyada mazbooti se judey hotay hain aur yahi wajah hai ke plastic 500 se ek hazaar saal tak khatam nahi hota.
Plastic ki isi mazbooti aur arsa daraaz nah khatam honay ki salahiyat ney hamein iske istemaal ki taraf Raghib kiya . hamari roz maraah ki zindagi mein plastic ka istemaal is qader ziyada hochuka hai ke iske istemaal ki baghair zindagi ka tasawwur hi mahaal hochuka hai. agar hum apne ird-gird nazar douhrayein to plastic ki bohat si masnoaat mileingi.
Kisi tafrehi maqam par masroor honay ke liye jayen to plastic ki bottles , glass aur deegar cheeze ko mojoodgi gandagi phelati nazar aayegi. isi tarha agar kisi darya ke kinare baithe thandhi hawa se lutaf andoz hona chahain to hawa ko gird alood karte udtey hue plastic ki Parnian is Hasseen nazare par daagh daar kardete hain.
Gharon mein istemaal ke baad pheink diye jaaney wala plastic nalion aur gutters mein phas kar pani ke bahao mein rukawat paeda karta hai aur wohi ganda pani galiyo aur sadkon par nikal aata hai jis se tarha-tarha ki bemariyan phelti hain.
Guzashta dinon Hyderabad aur is ke judwaa shehar secunderabd mein shadeed baarisho ki wajah se galiyo aur sadakon par nazar anay wali gandagi isi plastic ki marhoon minnat thi aur is ki rahi sahi kasar qurbani ke janwaron ki gandagi ko nikaal diya jo is ke baad sadkon aur galiyo ki raahon mein beh rahi thi.
Khilonoun, khanay ke bartanoun aur daboun, furniture aur barqi alaat mein plastic ke istemaal ney jahan lakdi ke istemaal ko kam karkay janglaat ko bachanay mein apna kirdaar ada kiya hai wahein zameen mein dabey plastic ney zair-e-zamin pani ke zakhair ko buri tarha mutasir kiya hai. yahi wajah hai ke duniya ke mukhtalif mumalik mein peenay ke saaf pani ki kami hoti jarahi hai.
Plastic ka istemaal sirf mahol ke liye hi nuqsandah nahi balkay tamam jandaroon ke liye bhi wabaal jaan hai. Plastic ke dabbay mein lazeez ghiza kisi zeher se kam nahi hai. school aur dafatir jaaney walay plastic ke dabbay mein khana le jatay hain jo ke Micro oven mein garam karkay khanay par zeher mein tabdeel hojata hai kyunkay garam honay par plastic ke ajza khanay mein shaamil ho jatay hain joke insani jism mein daakhil hokar cancer ki wajah ban sakte hain.
Tahaqeeq ney saabit kiya hai ke ( BPA) plastic ka ek aisa keemiyai juz hai jo cancer ka sabab bantaa hai. aksar plastic bananay walay karkhanay apna fazil maday ka ikhraj nehron aur naalon mein karte hain jis se aabi zindagi buri tarha mutasir hoti hai aur isi wajah se unki bohat si anwaa napaid honay ka khatrah bharne laga hai.
Ab hamaray zehnon mein yeh sawal gasht karne lagta hai ke ab to plastic hamari roz maraah istemaal ki har cheez mein paaya jata hai aur agar hukoomat ke kehnay par iska istemaal tark kar bhi den to unki zindagi mein bohat si mushkilaat paeda ho jaien gi lekin aisa hargiz nahi hai. aaj plastic ke mutabadil mutadid cheeze mojood hain jin mein kaghazi lifafay, kapdey ke thailay aur mahol dost shopper shaamil hain.
Hindustan mein hukoomat ke alawa bohat se taleemi aur sanati idaray plastic ke istemaal ke khilaaf muhim chala rahay hain. gharon mein plastic ki masnoaat ki bajaye cheeni ya sheeshay ke bartano ko tarjeeh den. plastic ke thailiyon ki bajanay mutabadil cheezon ka istemaal shuru karen. hamein plastic ke nuqsanaat se mehfooz rehne ke liye apna kirdaar ada karna hoga kyunkay mashhoor maqola hai ke qatra qatra samandar bantaa hai lehaza mahol aur mulk dono ki behtari ke liye har fard ka kirdaar ahem hai. –YTN STAFF