Scotland ke shehar Aberdeen ke nazdeek waqay aik qasba mein qismat ke dhAni zaeef jode ko phatay hue Lottery ticket se 110 million NZ Dollars (508 Crores rupay) mil gaye. Bartanwi akhbarat ke mutabiq 67 sala Bartanwi shehri Fred Higgins aur un ki ahliya Lesley Higgins apna Lottery ticket check krwane ke liye muqami store pahunche thay. Lottery Machine chalanay walay naujawan operator ne yeh kehte hue un ka ticket phaad kar kachray ki basket mein pheink diya ke is par inaam nahi nikla hai. Taham machine ne aik tehreeri pegham nikala jis mein kaha gaya ke mazkurah ticket ko sambhaal kar rakha jaye. Store ke muawin nigaran ne phatay hue ticket ke tukde kachray ki basket se nikaal kar wapas Higgins ko day diye. Jumeraat ki subah Higgins aur un ki ahliya ko yeh na qabil e yaqeen khush khabri mili ke un ke ticket ne 5 crore 79 lakh 75 hazar 367 pound ki inaami raqam jeet li hai. Higgins ke mutabiq Lottery ticket do hisson mein taqseem tha magar us par tamam number wazeh taur par maujood thay. Mrs. Higgins ne inaam ki raqam paate hi fauri apni mulazimat se istifa day diya. Unhon ne aik nai car pehlay hi khareed rakhi hai aur Barbados mein dosra ghar kharedne aur Hindustan aur China mein tatilaat guzarnay ki soch rahay hain. Mr. Higgins ne kaha ke Lottery ticket phatt jane ke bawajood bhi woh fikarmand nahi thay ke raqam inhen nahi miley gi. Unhon ne kaha ke woh jantay thay ke yeh aik sachhi ghalti thi.