Hyderabad: Panjagutta ke masroof tareen rastay Nagarjuna Circle Road par waqay sabiq Chief Minister Dr Marri chenna Reddy ke mujasmay ko 1 hafta ke andar Greater Hyderabad Municipal Corporation ( GHMC ) ke zariye doosri jagah muntaqil kardiya jayega. Chunkay Panjagutta ke qabrestan ke qareeb Steel Bridge par kaam taizi se chal raha hai, Shehri idaara ne Nargarjuna circle Junction mein bhi Junction ki behtari ke kaam karne ka faisla kiya. GHMC ke Mayor Bonthu Rammohan ne aur GHMC ohdedaroun ke hamrah Nagarjuna Circle mein tajweez kardah Junction behtari ke kamoun ka moana kiya.
GHMC ne Circle ke dono ateraaf sadak ko wasee karne ka kaam shuru kiya hai. Ek taraf Chutney Restaurant ke qareeb ek foladi Pole araha hai aur doosri taraf qabrestan ki taraf sadak ki choraai ka kaam jari hai. Mayor ne kaha ke sadak ki choraai aur Steel Pole ki taamer ke ek hissay ke tor par GHMC ne Junction mein behtari laane ka kaam shuru kiya hai.
Dr Marri Channa Reddy ke mujasmay ko muntaqil karna pada take Traffic ke aasani se bahao ke liye Junction ko wasee kiya jasakay. Mayor ne mujasmay ko behtar jagah par muntaqil karne ki zaroorat ki wazahat ki aur muntakhib kardah jagah par itminan ka izhaar kiya, Jahan mujasma muntaqil kardiya jayega. Shehri idaara Junction mein behtari laane ke baad 1 hafta ke andar mujasmay ko muntaqil kerega. –YTN STAFF