Jerusalem. Palestine mein muzahmatkar naujawan ladki Ahed Tamimi ko 8 mah qayed ke baad guzashta shab riha kardiya gaya hai. Bain ul aqwami khabar rasaan idaray ke mutabiq Israeli faujion ke mun par thapad raseed karne wali nidar ladki Ahed Tamimi ko jail mein 8 mah ki qaid o band ki savbtin uthany ke baad guzashta shab rihayi mil gayi hai. 8 mah ki sakht takaleef naazuk, kam sun ladki ke paya istiqlal ko mutazalzal nahi kar saken. Israeli hakkaam ney Ahed Tamimi ki rihayi ki tasdeeq kar di hai. Israel ke mehkuma mahabis ke tarjuman ney media ko bataya ke Ahed Tamimi aur un ki walida Nariman ko riha kardiya gaya hai. Donon qaidyoun ko un ke rehaishi ilaqa maghribi kinare bhaij diya gaya hai. Doosri janib Ahed Tamimi ney jail se azad honey ke baad press conference karne ka elaan kya hai. Ahed Tamimi ka poora gharana samaji karkun aur muzahmatkaar ke taur par shohrat rakhta hai. Wazeh rahay Palestine mein do Israeli sipahiyon ko tamancha raseed karne aur dhakkay dainey ki video manzar e aam par aney ke baad jurrat o bahduri ka isteara ban’ney wali naujawan ladki Ahed Tamimi ko qaabiz Israeli fouj ney December 2017 ko walida ke hamrah ghar se giraftar kya tha.
Falasteeni ladki Ahed Tamimi kaun hai?
Ahed Tamimi 16 baras ki ladki hai jo Palestine mein honey walay Israeli mazalim ke khilaaf apni aawaz buland karti hai. Ahed Tamimi ko Israeli fouj ney hirasat mein lainey ke baad is par baara ilzamaat aed kiye thay jo usay das baras taq jail ki salakhon ke peechay rakh satke thay. Ahed Tamimi Palestine ke aik gaon nabi Saleh mein rihaish Pazeer aik solah sala Falestini karkun hai. Ahed ke waalid Basim altmimi ka shumaar Israel ke khilaaf –apne watan ki azadi ki pur aman jad-o-jehad karne walon mein kya jata hai. Ahed Tamimi ka naam do saal qabal bhi is waqt khabron mein aaya tha jab un ki aik Israeli fouji ke haath par katney ki tasweer shaya hui thi jo un ke chhootay bhai ko girftar karne ki koshish kar raha tha. Is waqea se qabal 2012 mein bhi Ahed Tamimi ke Israeli faujion ke sath takraar aur haatha payi ki tasaveer manzar e aam par aayi theen jis ke baad inhen Turkey ke sadar Rajab Tayyab Erdogan ney mulaqaat ke liye bulaya tha aur inhen award se bhi nawaza tha. Ahed Tamimi ko hirasat mein kyun liya gaya hai? Bani Saleh mein kayi barson se har hafta Yahoodi bastiyoun ki taamer ke khilaaf ehtijaj kya jata hai. Aisay hi aik ehtijaj ke douran apne ghar mein daakhil honey walay Israeli faujion ko rokney ke liye Ahed Tamimi ney aik Israeli fauji ke chehray par thapad dey mara jis ki video Falasteeni sociall media par viral ho gayi thi.
Un fojion ney Ahed Tamimi ke 14 sala cousin ke sar par rubber ki goli maari thi aur ansoo gas ke shells Ahed Tamimi ke ghar par phainky thay jin ki wajah se Ahed Tamimi ke ghar ki khidkion ke sheeshay toot gaye thay. Is waqea ke teen din baad Israeli fauj ney raat mein Ahed Tamimi ke ghar mein daakhil ho kar usay hirasat mein le liya tha aur maghribi kinare mein waqay Israel ki aik Jail mein qayim khusoosi fauji adalat mein Ahed Tamimi par fardِ jurm aayed ki gayi thi. Ahed Tamimi par Israeli fouji par hamla karne, fouji ki pesha waranah zimma daryon ki injaam dahi mein rukawat daalney aur fouji ehalkaron par pathrao karne ke ilzamaat aed kiye gaye thay.