Riyadh: Arab wazraye kharja ney saltanat Oman ke wazeer kharja ki sadarat mein munaqidah video conference mein khabardaar kiya ke Palestine ke kisi bhi ilaqay ko Israel mein shaamil karna jungi jurm shumaar kiya jayega. Saudi khabar-rasan idaray ke mutabiq Arab wazraye kharja ki janib se jari bayan mein kaha gaya hai ke 1967 mein hathye gaye Palesteeni ilaqay ke kisi bhi hissay ko jis mein Ghor al-Urdun, Bahera Mardar ka shumali ilaqa aur Palestine aur ilaqoun mein qayem kardah yahodi bastiyan shaamil hain un mein se kisi bhi hissay ko Israel mein shaamil karna jungi jurm shumaar kiya jayega.
Israel is se qabal bhi bain ul aqwami qanoon, Aqwam mutahidda ki qarardadoun aur manshoor ki khuli khilaaf varziyan karkay Palestine ke khilaaf jungi juraim ka murtakib huwa hai. Arab wazraye kharja ney Online hungami ijlaas mein Americi hukoomat se mutalba kiya ke wo aqwam mutahidda ke manshoor ki pabandi karen. Mashriq wasti ki kashmakash se mutaliq aalmi qarardadoun aur bain ul aqwami qanoon ke ehkaam o zawabit ka ehtram kiya jaye.
Americi Israeli sadi ke saudey ke naam se qaabiz Israeli hukoomat ke khodsakhtah naqshoun aur sazishoun ki madad se dastbardar hojaye. Arab wazraye kharja ney yaqeen dilaya ke Arab mumalik Palesteeni ilaaqoun ko Israel mein shaamil karne aur Israeli astamar ka daira wasee karne ke khilaaf Palesteeni riyasat ke har iqdaam ki himayat karenge aur usay siyasi, Safarti, Qanooni aur maliyati wasail se bharpoor taawun karenge.
Arab wazraye kharja ney 4 friqi bain ul aqwami Committee se Appeal ki ke wo 2 reyasti hal aur mashriq wasti mein qiyam aman ke imkanaat ko bachanay ke liye fori ijlaas munaqqid karkay bain ul aqwami qarardadoun se hum aahang aalmi muaqqaf apna ne aur Israeli hukoomat ko astamari Schemes nafiz karne se rokay. –YTN STAFF