Hyderabad: Osmania university ke college of engineering ke ek girls hostel mein paish aaye waqiya jis mein aadhi raat ko ek chor ke dakhla ke waqiya ke baad jahan Campus ki talibat ne hifazati intizamaa ko behtar bananay ke liye ehtijaj kiya hai wahein Osmania university ka intizamia she team ke taawun ka khwaahan hai jiske liye is ne city police ko tehreer kardah ek maktoob mein yeh darkhwast bhi ki hai ke woh Campus mein she team ko tainaat kare.
Osmania university ke registrar professor SH Gopal Reddy aur university ke deegar hukkaam ne hostel ka doura karte hue waqiya ka muaina kiya aur is waqiya ke baad Campus mein sakht tareen iqdamaat karne ka taliba ko na sirf taiqun diya balkay city police se darkhwast ki hai ke woh Campus mein she teams ko tainaat bhi karen jis ke liye maktoob bhi rawana kardiya gaya hai. Yaad rahay girls hostel mein aadhi raat ko ek chor na sirf daakhil hua tha balkay chaaqu ki nok par isne talibat ko daraya aur dhamkaya bhi tha.
Is waqiya par university intezamia ne izhare-e-qayal karte hue kaha ke police ne hostel ke samnay ke hissa mein moujood 4 CCTV cameron ke mawaad ko jama kiya hai taakay khaati ki jald se jald giraftari amal mein layi jasakay.
Ohdedaron ne yeh bhi wazeh kiya hai ke chunkay chor hostel ke pichlle hissa se daakhil hua tha jahan koi camera mojood nahi hai lehaza yeh manfi pehlu chor ke haq mein ja sakta hai. Kushai Guda ke ACP Sudhakar ne kaha hai ke is waqiya ke khaati chor ko pakadney ke liye east zone police ne teen mukhtalif teams tashkeel di hain taakay jald az jald is khaati ko girftar kiya jasakay. is waqiya ke baad university intizamia jahan ek janib she team ko Campus mein tainaat karte hue talibat ke liye hifazati intizamaa ko sakht karne ke iqdamaat kiye hain to doosri janib CCTV cameron ki madad se khaati ki giraftari ke liye police apna kaam kar rahi hai. –YTN STAFF