Riyadh: Coronavirs ke khilaaf ladai ke tehat duniya bhar mein Lockdown kiya ja chuka hai jis ki wajah se aam zindagi maflooj hogi jis mein kayi lakh shadian multawi hogayi hain taham Hindustan ki riyasat Bihar ke maqam Bigusarai mein 2 behnoun ki Online shadi ke baad ab Saudi Arab se quarantine mein honeymoon ki khabar masool horahee hai.
Saudi nowjawan khalifa Al-Buenain aur is ki nai nowali Dulhan ne kabhi ye socha bhi nahi tha ke inhen honeymoon ka ek hissa Europi mulk aur dosra hissa Quarantine mein guzaarna padega. Tafseelaat ke mutabiq Khalifa Al-Buenain shadi ke baad apni ahliya ke hamrah honeymoon ke liye Italy gaye aur wahan pandrah din sair o tafreeh ki Coronavirus ki tabah kun khabrain aur Italy mein is ka asar dekh kar Saudi Arab wapas anay ka faisla karliya.
Dammam ke King Fahad International Airport pahunchaty hi dulha aur dulhan ka tibbi muaina kiya gaya aur Dulha Dulhan ko Quarantine bhaij diya gaya. khalifa Al-Buenain ne Media se guftagu mein kaha ke pandrah din Italy ke shehar Milan mein guzaray aur wahan se Dammam wapas hotay hi 14 din ke liye Quarantine bhaij diya gaya.
Al-Buenain ne mazeed kaha ke Corona ke muaina ka nateeja manfi aaya lekin inhen Quarantine mein sahet saholaten faraham ki gayen. Al-Buenain ke bamujab mein samjhta hon ke Quarantine mein ek terhan se Honeymoon ka baqi hissa poora kiya. Italy mein jo kami re gayi thi wo kami Quarantine mein poori hogayi. –YTN STAFF