Amravati: Shehriat tarmeemi qanoon aur NRC ke khilaaf Andhra Pradesh ke Vijaywada mein musalmanoun ki badi tadaad ne ehtijaj kiya. Ahtjajyoun ne apne hathoun mein Trenge, Siyah parcham aur playcards uthaye they jis mein ye likha gaya ke NO CAA. Un ahtjajyoun ne shehriat tarmeemi qanoon aur NRC ke khilaaf naaray baazi bhi ki.
Ahtjajyoun ne Vijayawada ke shehar ke mukhtalif maqamat par ye ehtijaj kiya aur muslim tabqa se is naarwa sulooq ke khilaaf riyasat geer ehtijaj ka intibah diya. Ahtjajyoun ne kaha ke hum shehriat qawaneen mein ghair zurori tabdeelioun ke khilaaf hamari aawaz riyasat bhar mein utthayen ge. Ye shehriat qanoon dastoor ki dafaa 14 ke khilaaf hai. Hum NRC ke mukammal mukhalif hain. Markazi hukoomat aur RSS mulk ki jamhoriat ki bunyadoun ko hilanay ki koshish kar rahi hain.
Soosri janib riyasat ke 3 dar-ul-hukomtoun ki tajweez ke khilaaf Andhra Pradesh ke dar-ul-hukoomat Amravati mein wukla ne ehtijaj kiya. Un wukla ne mutalba kiya ke riyasat ki 3 dar-ul-hukomtoun ki tajweez ke wo mukhalif hain aur mojooda dar-ul-hukoomat Amravati ko hi barqarar rakha jaye. Unhoun ne mutalba kiya ke hukoomat apni is nai tajweez se fori dastbardaar hojaye.
Vijayawada Bar Association ki janib se wukla ne ye ehtijaj kiya aur kaam ka boycott karte hue city civil court ke qareeb ehtijaj kiya. Un wukla ne playcards thaam kar hukoomat ki tajweez ke khilaaf naaray baazi ki. Is ehtijaj ki wajah se kuch der ke liye kasheedgi phail gayi. Un wukla ne hukoomat par shadeed barhami bhi zahir ki aur 3 dar-ul-hukomtoun ki tajweez ko ghair zurori qarar diya. –YTN STAFF