Hyderabad: Phones ki duniya mein apne waqt ka sab se bada naam Nokia ko smart phone ki aamad ke baad sare fehrist company ka muaqqaf Samsung aur Apple ke liye khaali karna pada halaanke is ney waqtan fouqtan smart phone ke shobay mein apne behtareen products ko mutaarif karte hue dobarah number 1 maqam haasil karne ki koshish ki taham usay woh kamyabi haasil nahi hui jo ke maazi mein usay haasil thi, iske bawajood duniya bhar aur khaas kar hindostan ke sarfeen mein hunoz ek gosha aisa moujood hai jo ke Nokia ke smart phone ko pasand karta hai yahi wajah hai ke company ki janib se is haftay Nokia 8 series ke alawa Nokia 7, Nokia 6 aur Nokia 5 series ke kuch naye models mutaarif kiye gaye hain jin ki qeematon mein bhi hindustani sarfeen ke paish e nazar tabdeeli ki gayi hai jaissa ke Nokia 6.1 plus phone ki qeemat 16,999 rupay rakhi gayi hai jis mein 64 GB memory dastyab rahaygi. isi tarha Nokia 2.1 jo ke aam sarfeen ke liye ibtidayi noiyat ka phone hai is ki qeemat 5499 rupay rakhi gayi hai. ibtidayi satah ke jo sarfeen hain unke paish e nazar Nokia ney apna naya phone Nokia 1 bhi muta-arif kiya hai jis ki qeemat sirf 3999 hai .
Mukhtalif tarz ke mazkoorah baala mobile phones mein android ki behtar se behtareen tecnology istemaal ki gayi hai jaissa ke operating system mein android 9 ka istemaal kya gaya hai. camera ke shobay mein bhi behtareen technology istemaal ki gayi hai. hindustani sarfeen ko asan aqsat par mobile phone ki dasteyabi ke liye HDFC bank ke sath finance ki sahoolat bhi faraham ki jarahi hai. jo afraad hunoz Nokia Phones ke dildada hain unke liye company ki janib se faraham kiye janey walay yeh naye phone ek nai tabdeeli saabit honge .- YTN STAFF