HEH The Nizam’s Museum mein numayesh ke liye rakhay gaye nawadiraat do kg wazni Heere aur Ruby jade Tiffin Box, Cup Saucer aur golden spoon ka sarqa. Sarqe ka pata chalanay Police ki 10 Teams tashkeel. Commissioner Police aur deegar aala ohdedaron ka daura. Administrative Officer Nizam’s Museum ki shikayat par muqadma darj.
HEH The Nizam’s Museum mein numayesh ke liye rakhay gaye nawadiraat do kg wazni Heere aur Ruby jade Tiffin Box, Cup Saucer aur golden spoon ka sarqa. Sarqe ka pata chalanay Police ki 10 Teams tashkeel. Commissioner Police aur deegar aala ohdedaron ka daura. Administrative Officer Nizam’s Museum ki shikayat par muqadma darj
Hyderabad. Nizam’s Museum se naadir ashiya ka sarqa karliya gaya hai. Sarqa karne walon ne Museum mein numayesh ke liye rakhi gayeen qeemti ashya ka sarqa karliya jin mein HEH Nizam ke zair e istemaal tilai (golden) tiffin box, aik cup aur aik saucer aur aik tilai chamcha shaamil hain. Bata ya jaata hai ke International Market mein in antique pieces ki qeemat 1-2 crore ho sakti hai. Yeh Museum jahan waqay hain uss se ½ km ke faasle par Police Station, ACP aur DCP ke dafaatir maujood hain. Yeh waardaat itwaar ki raat mein paish aayi aur Nizam’s Museum ke Administrative Officer Shaukat Hussain mein Police yeh shikayat darj karwai ki jab peer ke din Museum ko khola gaya tha to yeh paaya gaya ke aik showcase ka locks tootay hue hain aur aik tiffin box, aik tea set aur chamcha gayab hain. Unhon ne bataya ke sarqa karne walay ventilation ke zareya andar daakhil hue aur jis gallery mein yeh nawadiraat rakhay hue thae is ke CC Tv camera ko nuqsaan pohanchaya aur aik showcase mein rakhi hui yeh ashya sarqa karli. Unhon ne bataya ke Museum mein chaar galleries hain aur yahan ki qeemti ashya ki nigrani ke liye 10 CC Tv camera nasb hain. Museum ki nigrani ke liye din mein 5 aur raat mein 3 security personals maamoor hain. Unhon ne bataya ke Police ki mukhtalif teamon ne muqam e waardaat se shawahid akhatta kiye hain, figner prints waghera haasil karli gayi hain aur sniffer dogs ki bhi khidmaat se istifada kiya gaya hai. Shikayat ki mausooli par Mir Chowk Police ne aik muqadma darj karte hue mulzimeen ka pata chalanay 10 teams tashkeel di hai. Commissioner Police Hyderabad Mr. Anjani Kumar ne Museum ka daura kya. Bataya jata hai ke saariq/sariqeen ne Museum ki pehli manzil par aahani grill khol kar andar daakhil hue aur mazkurah ashya ki chori karkay faraar hogaye. Police ko shuba hai ke yeh jaankaar afraad ki hi karstani ho sakti hai. Bataya jata hai ke tiffin box do kg wazni hai jis par heere aur ruby jaday hue hain. Iss Museum mein Nizam ke zair e istemaal kayi qeemti ashya maujood hain. Bataya jata hai ke iss Museum mein 700-800 kg wazan ki besh baha ashya maujood hain jin ki bain ul aqwami market mein qadar aik mehdood andaza ke mutabiq 2,000 crore rupiya se bhi zayed hai. Pahele yeh Museum ground floor par tha jis ko baad azan first floor par muntaqil kya gaya hai. yeh bhi maloom huwa hai ke jis imarat mein yeh Museum waqay hai woh Prince Mukaram Jah Bahadur Trust ke tahet hai aur Museum Prince Mufakham Jah Bahadur ke Trust ke tahet hai. Guzishta kayi dinon se is imarat se Museum ke takhlia ke liye Prince Mukaram Jah Bahadur Trust ki janib se prince Mufakham Jah Bahadur ke Trust ko notices jari ki jarahi theen. Founder and Managing Trustee Deccan Heritage Trust Dr. Mohammad Safiullah ne bataya ke Museum mein numayesh ke liye rakhi gayi ashya agarchay Prince ki zaati milkiat mein hain lekin yeh aik qaumi asasa bhi hai jis ki hifazat sirf Trust par hi nahi balkay hukoomat par bhi aayed hoti hai. Unhon ne kaha ke yeh qeemti ashya jis imarat mein rakhi gayi hain woh Museums ke liye International miyaraat par khari nahi utarti hai. Hukoomat ko chahiye ke woh is Museum mein rakhi gayi nawadiraat aur qeemti ashya ki hifazat aur un ki munasib display ke intizamaa kiye jayen aur is ke liye salana grant manzoor ki jaye.