Dubai: Ab jabkay rawan saal 2019 ke ekhtataam mein aakhri chand ayyaam baqi reh gaye hain aur duniya bhar mein naye saal 2020 ka khermaqdam karne ki tayyariyan shuru hogayi hain to aisay mein tijarti duniya ka markaz tasawwur kiya jaaney wala ilaqa Dubai kisi se kaisay peechay reh sakta hai lehaza Dubai mein naye saal ka kher muqaddam karne aur naye saal ka jashn mananay waloun ko partayesh takreeb ke liye halaat sazgaar kiye jarahay hain. Jahan naye saal ki raat 1 dinner takreeban 1 lakh 80 hazaar rupiye ka hoga.
Dubai mein naye saal 2020 ki takrebaat ke liye hotels mein booking ka silsila zor-o-shore se jari hai. Booking ke narkh 400 feesad se ziyada badha diye gaye. Khasosan un maqamat par hotels ke narkh hosharba had tak badh gaye jahan se aatishbazi aur Dubai ke munfarid maqamat ke manazair qareeb se dekhe jasaktay hain. Beshtar hotel sad feesad tak booked ho chukay hain. Deegar tafseelaat ke mutabiq Jumeirah saahil par waqay hotel ke VIP Restaurant mein fikas dinner ke narkh 9000 darham ( Hindustani rupiyon ke aitbaar se 173772. 88 rupiye ) hain. Naqlat Jumeirah mein dinner offer 1200 se 3300 darham ke darmain hai.
Shoba sayahat ke mudeeran ne kaha hai ke Dubai ke beshtar hotels ne naye saal ki takrebaat ki tayari pehlay se shuru kar di thi aur ab booking ka aaghaz kardiya gaya tha. Restaurant ke narkhon mein izafay ki wajah sayyaho ki badhti hui tadaad hai. Amarati bashinday aur muqeem ghair mulki bhi naye saal ki takrebaat hotels mein mananay ke aadi ho chukay hain. Dubai mein tafrehi sargarmia aur takrebaat ka lutaf uthane ke liye loog dil khol kar kharch karte hain.
Dubai ke baaz Restaurant ne 12 baras se kam omar ke bachoun ke liye khusoosi sahuliyaat faraham kar rakhay hain. Kayi hotels ne saat afraad par mushtamil group ke allag se package jari kiye hain. Baaz hotels ne ek raat hotel mein guzaarne ke liye mukammal package pesh kiya hai. Khaano ke hawalay se package mukhtalif hain. Downtown mein five star hotels ke restaurant aur khalifa tower ke munfarid manazair ke qareeb restaurant ke narkh fikas 4 hazaar darham tak puhanche hue hain. Booking raat 8 bajey se le kar subah 3 bajey tak ki hai, Deegar restaurant ke narkh group booking ke hawalay se 700 darham tak hain. –YTN STAFF