Hyderabad: In dinoun Nagarjuna Sagar awaami tavajja ka markaz bana hua hai kyunkay 10 baras baad pehli martaba Nagarjuna sagar ke tamam 26 darwazoun ko kholtey hue pani ki nikasi ki gayi hai. rawan hafta Nagarjuna Sagar ke tamam darwazay kholnay aur pani ki nikasi ki khabar aam honay ke baad social media par noujawanon ney nah sirf is khabar ki kaafi tashheer ki balkay guzashta roz jab Hindustan bhar mein youm-e-azaadi ka jashnn aur tateel manayi jarahi thi to Whatsap status par hazaroun ki tadaad mein Nagarjuna Sagar ki tafseelaat moujood thi.
Tateel honay ki wajah se hyderabad aur iske atraaf wo aknaaf ke ilaqon se kaseer tadaad mein awam Nagarjuna Sagar ka rukh kya jis ki wajah se Nagarjuna Sagar ke rastay mein traffic jam dekhi gayi. hazaron ki tadaad mein sayaho ney is muqam ka rukh kya jis ki wajah se AP aur Telangan ke mukhtalif ilaqon se 8000 gadiyaan sagar road par dekhi gayeen. mehakma aab paashi aur NSP ke ohdedaron ney umeed zahir ki hai ke aanay walay dinon aur khaas kar itwaar ko is rasta par mazeed gadiyon ki amad wo raft hogi jis se traffic jam ka masla barqarar rahayga.
Yaad rahay 2 din qabal Nagarjuna Sagar ke tamam darwazon ko kholtey hue 9.46 laakh Cusecs pani ki nikasi ki gayi hai jabkay mazeed pani chodney jane ka imkaan hai. Nagarjuna Sagar mein khatrah ka nishaan 590 feet hai jis mein fil haal pani ki bulandi 585 feet hai. Nagarjuna Sagar mein ziyada miqdaar mein pani ki ek ahem wajah poli chantla project mein aaya selaab hai. jumeraat ko chunkay yom-e-azaadi ki tateel thi jis ki wajah se hyderabad aur is ke atraaf ke azlaa se Nagarjuna Sagar ka rukh karne walay sayaho ki tadaad hazaron mein thi ab umeed hai ke itwar ko bhi sagar road par traffic jaam ka masla ho sakta hai. sayaho ki kaseer tadaad ney Nagarjuna sagar ka rukh karne ki wajah se police aur mutaliqa ohdedaron ko zurori intizamaa karne mein kaafi diqat paish aarahi hai to doosri janib 10 kilometer ki doori tak bhi traffic jam dikhayi day raha hai. –YTN STAFF