New Delhi: Delhi intikhabaat ke rujhanaat se khush Aam Aadmi Party ke sarkardah leader Sanjay Singh ne apna pehla radd e amal media ke samnay dete huve kaha ke awam ne nafrat ki siyasat ko mustard karte huve kaam ko vote diya hai, Aur is ke liye Delhi ke loog mubarakbaad ke mustahiq hain. Unhoun ne mazeed kaha ke awam ne taraqqi aur qoum parasti ka intikhab kar ke saabit kar diya hai ke wo manfi siyasat ko pasand nahi karte.
Qabil zikar hai ke rujhanaat mein AAP bohat aasani ke sath hukoomat saazi ki taraf gamzan huvi aur BJP ke hukoomat saazi ke daaway sab khatam hogaye. Is silsilay mein Sanjay Singh ne media se kaha ke BJP ne Delhi Assembly intikhabaat mein apni poori sarkari mashnari laga di thi. Is ne 5 reyastoun ke Chief Minister, Kayi sabiq wazraye alla aur wazeer e dakhla Amit Shah ke sath sath deegar markazi wuzra ko bhi intikhabi tashheer mein laga diya tha. Lekin aaj Hindustan jeet gaya hai. Delhi mein awam ne nafrat ki siyasat ko poori terhan mustard kar diya.
Kayi BJP sarkardah leaderoun ke zareya Chief Minister Arvind Kejriwal ko dehshat ka maamla Sanjay Singh ne uthaya. Unhoun ne kaha ke isi party ( BJP ) ne Arvind Kejriwal ko dehshat gard qarar diya tha lekin unhoun ne is par koi jawab dainay ki jagah awam se sirf itna kaha tha ke aap ka beta hon aur aap ki khidmat ki hai. Aaj jo huva hai is se saabit ho gaya hai ke awam BJP ki taqseem karne wali siyasat ko achi terhan samajte hain. –YTN STAFF