Baghdad : Iraqi dar-ul-hukoomat Baghdad ke al tharir square mein muzahirey ke douran iraqi jode ne shadi karte hue tanao ke mahol ko Khushgawar yaado mein tabdeel kardiya hai. tafseelaat ke mutabiq Iraqi jode ne muzahirey ke douran dhoom dhaam se shadi ki. muzahireen ne shadi ke geet ga kar naye jode ki khusihyan dobala kardein.
Raksha driveron ne juloos ki shakal mein dulha aur dulhan ko unke ghar tak pohanchaya. Iraqi joda aroosi libaas mein muzahireen ke sath izhaar yakjahti ke liye qaumi parcham uthaye hue tha. wazeh rahay ke baghdad aur Iraq ke mukhtalif sobon mein ek haftay se muzahiron ka silsila jari hai.
Iraq ke insani huqooq commission ne haftay ko junoobi shehar basrah mein security forces aur muzahireen ke darmiyan jhadpon mein 120 afraad ke zakhmi honay ki tasdeeq ki hai. Iraqi insani huqooq commission ke mutabiq Iraqi security forces ne haftay ko basra mein senkdon muzahireen ko muntashir karne ke liye barah-e-raast firing aur shelling ki hai. zakhmion ka dawakhano mein ilaaj kiya ja raha hai.
Dawakhano ke zaraye ne kaha hai ke baghdad ke al tharir square mein haftay ki subah honay wali jhadpon mein 1 shakhs halaak hogaya jabkay darjanon zakhmi hain. basrah mein junoobi bandargaah umm-e-qasr ki janib jaane wali shaahrahon par hazaron afraad ne dharna day rakha hai. bandargaah par guzashta chaharshambe se tamam sargarmia moattal hain. muzahireen ne basrah mein waqay Majnoon aail field ki janib jaane wali shahrah ko bhi bock kardiya hai. –YTN STAFF