New Delhi: TikTok Star Faisal Siddiqui ka TikTok Account tezaab gardi ki tashheer ki wajah se moattal kardiya gaya hai. Faisal ki mazkoorah video ke guzashta kuch dinoun se TikTok aur YouTube sarfeen ki janib se shadeed tanqeed ki zad mein thi.
Faisal ki tezaab ke hamlay ki himayat karti video par shadeed tanqeed ki jarahi thi aur Account moattal karne ka mutalba kiya ja raha tha. Mulk mein tehelka machane wali Faisal ki TikTok video mein wo Lipsing aur nakaam aashiq ki adakari karte huve junooni muklmay boltay nazar aarahay hain.
TikTok video mein Faisal apni Girlfriend par ghusse ka izhaar kar rahay hain jo inhen kisi aur shakhs ke liye chod kar chali gayi hai. Video ke kisi hissay mein koi mutanazia harkat nahi lekin mukalama khatam hotay hi wo ek Glass ka mehlool ladki ki taraf uchhalte hain jis ke baad ladki ke chehray par julne ke nishaan dikhayi dete hain.
Faisal Siddiqui ki is video par ye tanqeed ki jarahi thi ke unhoun ne apni is video ke zariye khawateen par tezaab phainknay ke ghenaone jurm ki tashheer ki hai. Hindustan ki National Commission For Women ki Chairperson Rekha Sharma ne TikTok intizamia ko khat likha hai jis mein unhoun ne TikTok Star ka Account moattal karne aur video ko Delete karne ka mutalba kiya hai. TikTok intizamia ne un ki shikayat ko sanjeedgi se liya aur fori tor par Delete kardiya. –YTN STAFF