Johnsburg: Hindustan mein haliya dinoun mein manzoor kiye gaye shehriat ke mutanazia qanoon ke khilaaf mulk se shuru honay walay muzahiray duniya bhar mein phelnay lagey. Dubai, Janoobi Africa, America, Bartania aur Australia mein qanoon ke khilaaf ehtijaj kiya gaya.
Tafseelaat ke mutabiq mutanazia shehriat qanoon par ehtijaj hindustan se nikal kar duniya bhar mein phelnay laga, Dubai mein is qanoon ke khilaaf muzahira kiya gaya. Awam ne RSS aur Modi hukumat ke khilaaf naaray lagaye.
Janoobi Africa mein bhi loog is ke khilaaf sadkoun par nikal aeye, Johnsburg mein hindustani consil khanaay ke bahar ehtijaj kiya gaya, Playcards uthaye muzahireen ne hindustan se azaadi haasil karne ka mutalba kiya.
Shehri Fatima Lehar, Iqbal Jasaat ne kaha hai ke hindustan mein kalay qanoon ke manzoor kiye jany ke khilaaf awam se yakjahti ke liye niklay hain, Hum ne dekha hai taalib ilm ehtijaj kar rahay hain, Modi hukoomat manzoor kiye gaye kalay qanoon ko wapas le.
Yaad rahay ke rawan mah ki 11 tareekh ko manzoor kiye gaye shehriat tarmeemi qanoon ke khilaaf hindustan bhar mein shadeed ehtijaj jari hai, Lakhoun afraad mulk ki mukhtalif reyastoun mein ehtijaj kar rahay hain jabkay is douran police ke sath jhadpoun ke douran 29 muzahireen halaak hogaye hain sab se ziyada halakatin riyasat Uttar Pradesh mein hui hain.
Doosri taraf janoobi Africa ki terhan mutahidda Arab Emarat mein bhi hindustan mein manzoor kiye gaye qanoon ke khilaaf muzahira kiya gaya, Muzahiray ke douran awam ne qanoon ke khilaaf buland shagaaf naaray lagaye.
Wazeh rahay ke hindustan ki taraf se manzoor kiye gaye qanoon mein musalmanoun ke sath imtiazi sulooq kiya ja raha hai jis mein Sikh, Hindu, Isaai, Jain, Paarsai sameit deegar logoun ko to shehriat di jaye gi jabkay musalman is fehrist mein shaamil nahi hain. –YTN STAFF