Mumbai : Mumbai mein barish ka qehar jari hai aur shumal maghribi Mumbai ke Mald, ilaqa mein ek rehaishi imarat ki deewar munhadim honay ki wajah se 20 makeen halaak hogaye aur 14 ko zakhmi haalat mein hospital pohanchaya gaya hai. shehar ke atraf ilaqoun may tofani barish aur samandar tughyani ki paish qiyaasi ke paish-e-nazar hukoomat ne high alert ke sath hi aam tateel ka elaan kardiya hai, dafatir, school aur college mein chhutti day di gayi, Pune mein do roz qabal isi tarhan deewar munhadim honay se 15 Mazdoor halak hue they. shehar mein mosaladhar barish ka silsila jari hai, jo ke mazeed 2-3 din jari rahega, aas paas ke nala supara vasayi ilaqay mein selabi sorat-e-haal hai, trains ko mansookh ya bairooni station par rok diya gaya hai.
Police aur fire brigade zaraye ke mutabiq muzafati ilaqa Maladh ke mashriq mein waqay Pumpar para mein ek ihata ki deewar mut-tasil jhopadh basti ke jhopadey par girnay ke nateejay mein sainkado amwaat hui hain aur andesha hai ke malbay mein log dabey hue hain, NDRF ke jawan jaye haadsay par pohanch chuke hain. zakhmion ko shatabadi dawakhana mein daakhil kiya gaya hai. itwaar se jari barish ka silsila peer ki shab mein dobarah zor pakadh gaya aur raat bhar honay wali barish ne Mumbai mein selabi sorat-e-haal paeda kar di lekin aaj subah se iske silsila mein kisi qader rukawat hui hai.
Mumbai ke nashebi ilaaqoun may jagah jagah pani jama hogaya hai aur Moter gadi doob gayi hain. bataya jata hai ke jazeera numa shehar ke bajaye muzafati ilaqay burii tarhan mutasir hue hain jahan guzashta do dahoun se tamirati kaam jari hai aur mansoobah bandi nah honay ke sabab un ilaqoun ko mutasir kiya hai, Mumbai ki local Trains par kaafi asr padha hai . –YTN STAFF