Dubai: Mumbai Indians ke khilaaf sansani khaiz muqablay ke Super Over mein kamyabi ke baad Kings XI Punjab ke Captain KL Rahul ne kaha hai ke Team ko is waqt is jeet se 2 nishanaat ki ashad zaroorat thi.
Mumbai ne opener Quinton de Kock ke 53 aur Kieron Pollard ke na qabil-e-shikast 34 runs ki madad se 20 overs mein 6 wickets par 176 runs ka mushkil score kiya tha jabkay Captain KL Rahul ke 77 runs par Punjab ne 6 wickets par 176 runs banaliye. Score barabar honay par match faislay ke liye ek super over mein gaya. Pehlay super over mein Punjab ne 5 runs banaye jabkay Mumbai bhi 5 runs hi bana saki. Dosray super over mein Mumbai ne 11 runs banaye jabkay Punjab ne 15 runs banakar match jeet liya. Is jeet ke sath hi Punjab ne Tournament mein apni umedon ko barqarar rakha.
Rahul ne kaha ke super over pehli martaba nahi huwa hai aur ab mein is ka aadi hogaya hon lekin kamyabi se do nishanaat haasil karna hamaray liye bohat zaroori tha. Yeh hamesha nahi hota hai lehaza aisi sorat-e-haal mein aap ko tawazun rakhna padta hai. Hum ne jis match mein shikast khayi is mein hum ne bhi umdah karkardagi ka muzahira kiya. Hum har match mein sakhti se wapas aaye hain aur is match mein fatah se hamein tehreek aur madad miley gi. Unhoun ne kaha ke 20 overs mein wicket capping ke baad pehlay 6 overs mein batting karna bohat mushkil hai. Hum jantay thay ke Mumbai ke achay Spinner hain aur pitch sust hogi lehaza Mayank aur mein ne team ko achi shuruvaat dainay ki koshish ki. Jab Chris Gayle Sponser ke khilaaf khailtay hain to mujhe yaqeen rehta hai ke woh acha khelain ge.
Captain ne kaha ke Gayle ki mojoodgi se madad mili hai. Woh ek tajurbahkar khiladi hain aur team ko agay le jane ka tareeqa jantay hain. Koi team super over ke liye tayyar nahi hoti. Aisi sorat-e-haal mein aap ko apne bowling shoba par inhisaar karna hoga. Mohammad Shami 6 baal Yorker kar satke hain aur woh team mein behtareen bowler hain. Rahul ne kaha ke yeh zaroori hai ke senior khiladi jeet mein hissa ada karen. Jab aap mustaqil tor par hartay hain to aap ko tamam fatohat se khushi millti hai. Dressing Room ne is amal par tawajah dainay aur pursukoon rehne ke baray mein baat ki. Yeh mahol hum agay bhi barqarar rakhna aur match jeetna chahtay hain.