Lucknow : Samajwadi party ( SP ) ke sir parast Mulayam Singh Yadav , mangal ko apne saathi Mohammad Azam Khan ki himayat mein samnay aaye aur kaha ke BJP hukoomat mein kuch officers aur rehnumao ne inhen nishana banaya hai. taqreeban teen saal ke waqfay ke baad press conference se khitaab karte hue Mulayam Singh Yadav ne elaan kiya ke woh Azam Khan ki himayat mein ek muhim ki qiyadat karenge. SP ke sarparast ne kaha ke ”woh ek ya do din mein muhim ki tareekh ka elaan karenge.
Unhon ne kaha samaj wadi party ke tamam rehnumao aur kaarkunon se appeal ki ke woh, is mushkil ghadi mein Azam Khan ke liye muttahid ho kar laden aur unka sath den. unhon ne kaha ke’ mein Azam Khan ko kayi dahaiyo se jaanta hon aur woh koyi ghalat kaam nahi kar sakte. unhon ne kaha ke Agar Azam Khan par zayad-ti band nahi hui to woh is muamlay mein wazeer-e-azam Narendra Modi se mulaqaat karenge.
Dilchasp baat yeh hai ke Mulayam singh ke Farzand Akhishesh Yadav, mazkoorah press conference mein mojood nahi they. Mulayam singh ki himayat aur appeal is liye bhi ahmiyat ki haamil hai ke Rampur mein kayi ek muqadmaat ka saamna karne walay Azam Khan ki himayat mein kisi bhi SP rehnuma ne aaj tak baat nahi ki hai.
Mulayam singh ne Azam Khan ka difaa karte hue kaha ke unhon ne Jawhar university ki taamer ke liye mulk aur beron mulk apne doston se chandah ki darkhwast ki thi. unhon ne kaha ke hoasakta hae ke kuch foot araazi par tajawazaat ki hain, lekin woh mujrim nahi hain. unhon ne mazeed kaha ke BJP mein kuch rehnumao ko bhi lagta hai ke Azam kaan ke khilaf zyadatio se hukoomat aur party ki image kharab hogi. lekin kuch afsaraan hain jo SP ke arkaan ko nishana bana rahay hain.
Ek sawal ke jawab mein, Mulayam Singh Yadav jazbati ho gaye aur kaha ke’ Azam kaan imandaar hain aur yaqeenan woh zalim nahi hain, jaissa ke inhen kaha ja raha hai. unhon ne Media se appeal ki ke SP ke rukan parliment ke sath honay wali na-insafi ko ujagar karen.
Azam Khan ke khilaaf pichle do mah ke douran, Jawahar university ke liye zameen par qabza, tajawazaat, kitaab chori, mujasmay ki chori ki aur bhainson ki chori ke 78 se ziyada waqiyat mein muqadmay darj kiye gaye hain. Rampur mein police ne unke Humsafar resort “ ki ek deewar bhi munhadim kar di hai. Saath hi Azam Khan ki behn nikhat akhlaq ko guzashta jummay ko police ne pooch tach ke liye hirasat mein liya tha, kyunkay who Jawahar trust ki khazanchi hain. –YTN STAFF