Dhaka: Duniya bhar mein Coronavirus ke badhatay khatray ke pesh e nazar Bangladesh mein Babaye Qoum Mujeeb Ur Rehman ki paidaiesh ki sadi ke mauqa par munaqqid honay walay Mujeeb saal ki azeem ul shan iftitahi taqreeb mansookh kardi gayi hai aur wazeer e azam Narendra Modi ka Dhaka dora bhi mansookh hogaya hai. Mujeeb saal ki taqreeb ke liye qaumi Committee ke ahem coordinator Kamaal Abdul Al-Naser Choudhary ne kaha hai ke Mister Modi sameit mukhtalif mumalik ke sarbarahoun ko 17 March ko honay walay is program ke liye madoo kiya gaya tha lekin Coronavirus ke phelnay ke sabab peda honay walay mojooda halaat ke darmain bohat si ghair mulki shaksiaat ne apna dora mansookh karne ka faisla kiya hai jis mein Hindustani Wazeer e Azam Narendra Modi bhi shaamil hai.
Unhoun ne kaha ke naye Program ki tarikhoun ka taayun hotay hi unhein dobarah madoo kiya jayega. Mujeeb saal ki yaad mein saal bhar chhotay pemanay par Program munaqqid kiye jatay rahen ge. Secretary kharja Harsh Vardhan Shringla ne Modi ke doray ki tayarioun ka jaiza lainay ke liye haal mein Dhaka ka dora bhi kiya tha. Ye iftitahi taqreeb National Prayed Ground mein munaqqid honay wali thi aur is ke sath hi pooray saal chalne walay Programs ka ineqad shuru honay wala tha. Dr. Choudhary ne kaha ke iftitahi taqreeb ke ilawa jo Program honge, Un mein baday pemanay par awam ki mojoodgi se bacha jaye ga.
Ghhor talabb hai ke Bangladesh mein itwaar ko Coronavirus ke pehlay 3 mamlaat samnay aa chuke hain. Tibbi jaanch ke douran ek hi khandan ke 2 Mard aur ek Aurat mein Coronavirus misbet paaya gaya hai. Mutasireen mein se 2 Italy se wapas aeye hain jabkay mazeed ek aur Dhaka mein un ke khandan ka rukan hai. –YTN STAFF