Dhaka : ICC ki janib se test aur T20 captain Shakib Al Hasan par 2 sala pabandi aaed honay ke baad team mein machi halchal ke baad November mein dora-e-hind ke liye momin ul Haq ko naya test captain aur Mahmood Ullah twenty 20 ka naya captain muqarrar kiya gaya hai.
Bangladesh ki team Hindustan ke doray par hai jahan woh 3 T20 aur do test khailaygi. is doray ka aaghaz 3 November ko Dehli mein honay walay pehlay T20 match se hoga.
Saqib ki jagah spiner Tezul islam ko twenty 20 team mein shaamil kiya gaya hai. Abu Haider ko all rounder Mohammad Saif uddin ki jagah team mein shaamil kiya gaya hai, jo pichlle haftay kamar ki takleef ke baais team se bahar hue they. Tamim Iqbal ki jagah Mohammad mithan ko shaamil kiya gaya hai. Umar al khais ko test team mein shaamil kiya gaya hai. is se qabal Bangladesh cricket team ko bada jhatka laga hai. ICC ne team ke star all rounder Shakib Al Hasan par 2 saal ki pabandi aaed kardi hai.
Shakib Al Hasan par ye pabandi match fixing ki peshkash milnay ki baat chhupanay par aayed ki gayi hai. Bangladesh ke test aur T20 team ke captain Shakib Al Hasan ne ICC ke anti corruption unit ke teen zawabit ki khilaaf warzi karne ki baat qubool karli, jiske baad un ke khilaaf yeh karwai ki gayi. Shakib Al Hasan haal hi mein khatam hue ICC world cup 2019 mein sab se ziyada runs bananay walay batsmen ski fehrist mein teesray number per they.
Chunkay ICC ne Shakib par aayed ki gayi 2 saal ki pabandi ko ek saal muatali ki muddat mein rakha hai, is liye woh 29 october 2020 se phir se bain ul aqwami cricket kheil sakenge. Shakib Al Hasan ne world cup 2019 mein shandar karkardigi ka muzahira kiya tha, lekin is tournament ke baad se unke sath kuch sahih nahi ho raha hai. Shakib Al Hasan aur Bangladesh cricket board ke darmiyan bhi sab kuch sahih nahi chal raha hai.
Haal hi mein Shakib Al Hasan ki qayadat mein Bangladesh ke cricketaron ki tankhowa badhaane ka mutalba karte hue hadhtaal ki. is ke baad Bangladesh cricket board ne tahseer ke mauzo per shakib Al Hasan ko notice day diya tha. BCB cheif ne ishaaron hi ishaaron mein Shakib Al Hasan ke Hindustan doray par nah anay ki baat kahi thi aur ab is baat par mohar bhi lag gayi hai. –YTN STAFF